Paasinartumik tunngaveqarluni Kalaallit Nunaanni silaannakkut angallassinissamut akuersissuteqartoqassaaq

 

Ulloq 3. julimi Sermitsiaq.AG-mi ilanngussami piffissami sivisuumi suliamik Namminersorlutik Oqartussat suliarinnerarlugit Greenland Express uparuaavoq, tassa Kalaallit Nunaanni timmisartuussinissaq pillugu ingerlatseqatigiiffiup qinnuteqaataata suliarinissaanut atugassanik paasissutissanik tunniusseqqullugu ingerlatseqatigiiffimmut Namminersorlutik Oqartussat piumasaqarmata.

Kalaallit Nunaanni pilersitserusuttunut suliffeqarfinnut nutaanut Naalakkersuisut akornuseerusunngillat. Suliniutit nutaat Naalakkersuisunit nuannaarutigineqarput inuussutissarsiortullu ingerlasinnaasut nutaaliortullu pingaaruteqarneri akueralugit. Tamanna suliaqarfinnut tamanut atuuppoq, silaannakkut angallassineq ilanngullugu.

Suliffeqarfiit pilersitsiniarsarisut suliamik sukkasuumik suliarinnittoqarnissaannik kissaateqarnerannut Naalakkersuisut paasinnilluarput, tamannalu kissaatigisaq naammassiniarlugu Namminersorlutik Oqartussat suliaqarlutik. Silaannakkut angallassinissaq pillugu qinnuteqaat pineqartillugu, angallanneq pillugu inuiaqatigiit innuttaasullu isumannaatsuunissaat tamatigut salliutinneqartarpoq.

Nunatsinnut ilisarnaataavoq nunap isorartunerujussua, nunasiffiusut siamasinneri innuttaasullu ikitsuuneri. Taakku tamarmik isumaqarput niuerneq tunngavigalugu Kalaallit Nunaanni silaannakkut angallassinissamut periarfissat killeqartut, taamaattumillu silaannakkut angallassinissamut akuersissummik qinnuteqartoqassalluni. Sulinermini Namminersorlutik Oqartussat Kalaallit Nunaanni timmisartuussinissamik akuersissuteqarusullutik qinnuteqartunut tamanut akuersaarniarsimapput.

Angallannermut tunngasuni Naalakkersuisutut suliassanni pingaarnerpaaq tassaavoq naammaginartumik atugaqarluni nuna tamakkerlugu ilaasunik angallassinermi innuttaasut toqqissisimanissaasa qulakkeernissaat. Taamaattumik Kalaallit Nunaanni silaannakkut angallassinermik ingerlatsiniarluni qinnuteqartup kialuunniit qinnuteqaatip suliarinissaanut, Namminersorlutik Oqartussanit atorfissaqartinneqartunik paasissutissanik tamanik tunniussinissaq piareersimaffigisariaqarpaa.

Kalaallit Nunaanni niuerneq tunngavigalugu ingerlatsinissap isumaginissaanut timmisartuussinissamut akuersissut pillugu qinnuteqaatit marloqiusamik suliarineqartarput, tassani Danmarkimi  Angallannermut Aqutsisoqarfik aamma Namminersorlutik Oqartussat peqataasarlutik. Qinnuteqaatip qanoq ittuunera aamma qinnuteqaatip annertussusia apeqqutaatillugu piffissap suliamik suliarinniffiusup qaammatit marluk tikillugit sivisussuseqarsinnaanera naatsorsuutigineqarsinnaavoq, Kalaallit Nunaanni silaannakkut a-ngallassinermut akuersissutaasinnaasup paasinartumik tunngaveqarnissaa qulakkeerniarlugu.

 

Paasissutissat annertunerusut pillugit attavigineqassaaq: Peqqissutsimut Attaveqarnermullu Naalakkersuisoq Steen Lynge, Naalakkersuisoqarfimmi pisortaq Ann Birkekær Kjeldsen aqqutigalugu oqarasuaatikkut:

 +299 48 49 15 imaluunniit e-mail: abk@nanoq.gl