Steen Lynge salloqittaanngilaq!

Peqqissutsimut Attaveqarnermullu Naalakkersuisup Steen Lyngep aalajangiussimavaa Nuup Umiarsualiviata tunuani namminersorlutik oqartussanit 100 %-imik pigineqartumik aktianik piginneqatigiiffimmik pilersitsinermut 80 mio. kr.-inik pissarsineq pineqartillugu atuisut akiliuteqartarnerat annertusissanngitsoq.

KNR-ip nittartagaani tallimanngorneq 28. junimi ilanngussaq naapertorlugu Demokraatit isumaqarput Nuup Umiarsualivianik pilersitsinissamut pissarsiarineqartussanik 80 mio. kr.-inik aningaasalersuinermit innuttaasut eqqorneqannginnissaat pillugu Steen Lynge innuttaasunik salloqittaasoq.

- ”Naalakkersuisut isumaqarluinnarput Namminersorlutik Oqartussat kisimik piginnittuunermikkut atuisut annertunerusumik akiliisalissanngitsut. Atuisut akiliuteqartarnerat pillugu apeqqummi namminersorlutik oqartussanit 100 procentimik piginnittuunerup aamma piginnittut arlaliunerisa akornanni assigiinngissuseqanngilaq. Taamaalilluni piviusut pillugit salloqittaasoqanngilaq”, taamatut oqarpoq Steen Lynge, Peqqissutsimut Attaveqarnermullu Naalakkersuisoq.

Nuummi umiarsualivimmik nutaamik pilersitsinissaq pillugu Naalakkersuisut suliarinninnerannut atatillugu aalajangerneqarpoq Inatsisartut 2013-mi Ukiakkut Ataatsimiinneranni aalajangiiffigisassatut siunnersuummik saqqummiussisoqassasoq. Aalajangiiffigisassatut siunnersuutip namminersorlutik oqartussanit 100 procentimik pigineqartumik aktianik piginneqatigiiffimmik pilersitsisoqarneratigut Nuummi umiarsualivimmik nutaamik pilersitsinermut tunngatillugu 2014-mi Upernaakkut Ataatsimiinnermi inatsisinik ataatsimoortunik Naalakkersuisut saqqummiusseqquneqassapput.

Aktianik piginneqatigiiffimmut nutaamut aningaasaliissutinik aningaasalersuineq namminersorlutik oqartussanit pigineqartunit aktianik piginneqatigiiffinnit allaniit iluanaarutit qaffannerisigut aamma Nukissiorfinnut taarsigassarsiassatut killiliussat annikillisinnerisigut pissaaq. Iluanaarutit qaffanneri aktianik piginneqatigiiffinni sipaaruteqarnikkut imaluunniit sinneqartoorutit ikilisinnerisigut aningaasalersorneqassapput. Royal Arctic Line A/S aamma umiarsulivimmik piginneqatigiiffimmi nutaami 20 mio. kr.-inik aningaasaliinissamut missingersuusiussaaq, taakku aktianik piginneqatigiiffimmi nutaami aningaasaliissutinut aningaasalersuinertut nunatta karsianut ilanngunneqassapput. Aningaasalersuinerit sinneri taarsigassarsiassat Nukissiorfinnut ingerlatinneqartussaagaluit paarlaatsinnerisigut pissarsiarineqassapput. Nukissiorfinnut taarsigassarsisitsineq aamma aktianik piginneqatigiiffimmut nutaamut taarsigassarsisitsineq nunatta karsianut utertillugit akilerneqartussaapput. Aningaasalersuineq taamaalilluni innuttaasunut sunniuteqassanngilaq.

Umiarsualiviup nutaap pilersinneqarnissaa pillugu 2013-mi Ukiakkut ataatsimiinnermi ataatsimoortumik oqallinnissamut Naalakkersuisut qilanaarput.

- ”Ukiaru ataatsimiinnermi oqalliseriarta. Pitsaasumik siunnersuuteqarpugut, taannalu partiit allat peqatigalugit oqallisigerusupparput. Siunnersuummiipput soorunami akisussaassuseqartumik aningaasalersuinissamik aaqqissuussineq, kisianni aamma isiginninnerit allat soorlu ilinniartunik nunaqavissunillu sulisunik atuinissaq, tamannalu isumaqarpugut erseqqissarnissaa pingaartoq,” naggasiivoq Steen Lynge.

 

Paasissutissat annertunerusut pillugit attavigiuk: Peqqissutsimut Attaveqarnermullu Naalakkersuisoq Steen Lynge, Naalakkersuisumut allatsi Ove Frank Heilmann aqqutigalugu oqarasuaat: +299 34 66 63 imaluunniit e-mail: ovhe@nanoq.gl