Bettina Kristiansen-ip allagaanut ammasunut Peqqinnissaqarfiup qullersaqarfia akissuteqarpoq

 

Kræftimik nappaatilik sivisuumillu nakorsarneqarsimasoq nappaamminik nangitsigaangat alianartaqaaq.

Bettinap misigisaminik allanut taama atugalinnut avitseqateqarsinnaanera sapiitsuliorneruvoq. Bettinap sapiissuseqarnera peqqinnissaqarfimmi sulisut taartaagallartartullu taarseraannerannut tunngatillugu immikkut unammilligassaqarnitsinnik paasinnissinnaassuseqarneraguttaaq ersersinneqarpoq.

Ajoraluartumik pissutsit taamaattut ukiuni aggersuni ilinniakkaminnik naammassisut amerlinerisigut sivisunerusumik sulisoqarsinnaalernissap anguneqarnissaata tungaanut, Peqqinnissaqarfimmut suli unammilligassaagallassapput. Sulisut sapinngisartik tamaat ajunnginnerpaamik sullissigaluit, Bettinap nalaataanut alianartumut assingusunik naapitsinermi, ullumikkut atugassarititaasut immikkut malunniuttarput.

Kalaallit Nunaanni iviangikkut kræftimik nappaatilinnik nakorsartinnissamut neqeroorut tamatumalu kingorna malittarinninneq, Qallunaat Nunaanni iviangikkut kræfteqartunik nakorsaanermi qitiusumik immikkoortortaqarfimmi (DBCG)  maleruagassat naapertorlugit ingerlanneqarpoq. Ajoraluartumik suliaritereernerup/nakorsarneqareernerup kingorna malinnaaffigineqarnikkut nappaammik nangitsisinnaaneq pitsaalineqarsinnaananilu annikillisinneqarsinnaanngilaq. Kræftimut nakorsartereernermi malittarinninnikkut misissuinissamut, oqaloqatiginninnissamut tapersersuinissamullu peqqinnissaqarfik periarfissinneqarpoq.

Napparsimasoq ammasumik ilumoortumillu oqaluttuutissallugu, tamatumalu peqatigisaanik napparsimasup sapinngisaq tamaat pisarnermisut inuunermik naleqartitamik, nakorsartinnermut atatillugu peqqissinissamut neriuuteqarnikkut  attassiinnarnissaanik qulakkeerinissamut oqimaaqatigiissitsiniarneq, tamatigut ajornakusoortuuvoq.

Innuttasut peqataatsinneqarnerat- nakorsartinnermi matumani pineqartumut allanullu- peqqinnissaqarfimmut attaveqarnerup pitsaasumik misigineqarneranut qulakkeerinneqataavoq. Peqqinnissaqarfimmi qullersaasugut oqaloqatigiinneq annertunerusumik samminiarparput innuttaasunullu kiffartuussinitta pitsanngorsaavigiuarnissaa sapinngisarput tamaat sulissutigissavarput. Anguniakkat tamakku pillugit Peqqinnissaqarfiup immikkoortortaani tamani pisortanik oqaloqateqarnerit aallarnerpagut, taamaasiornitsigullu nunatsinni innuttaasunut tamanut anngussinnaanissarput neriuutigaarput.  

 

Paasissutissat sukumiinerusut nakorsat qullersaat Anne-Marie Ulrik oqarasuaatikkut: +299 34 43 19 imal. e-mail-ikkut: amu@peqqik.gl attavigalugu pissarsiarineqarsinnaapput.