Nunani Avannarlerni Ministerit Siunnersuisoqatigiiffiat: Missingersuutit pillugit ataatsimiinneq

 

Nunani avannarlerni ministerit suleqatigiit juulip ulluisa aappaanni Visby-mi ataatsimiipput.

Ataatsimiinneq Miiti Lyngep Naalakkersuisunut ilaasortatut nutaatut Kalaallit Nunaat sinnerlugu nunat avannarliit suleqatigiiffianni ataatsimiititsinerit peqataaffigisaasa siullersaraat.

Ministerit suleqatigiit Nunani Avannarlerni Ministerit Siunnersuisoqatigiiffiata ukiumut tullermut missingersuutinut missingersuusiaq naammassivaat. Isumaqatigiissutigineqartutut missingersuutit 2013-imut naleqqiullutik 5%-inik ikinnerupput, kisiannili ministerit isumaqatigiipput, aaqqiissutissamik oqimaaqatigiinnerusumik, ukiumi tullermi nunat avannarliit suleqatigiinnissaannut tunngaviliilluartumik angusaqartoqartoq.

Suleqatigiinneq annertusisaq

Ministerit Siunnersuisoqatigiiffiata nunanik baltiskiusunik aammalu Ruslandip avannaata kitaanik suleqateqarnera ministerit akunnerminni oqaloqatigiissutigaat, tamatumalu ingerlateqqinneqarnissaa isumaqatigiissutigaat, taamaaliornikkut sanilitta qaninnerpaat oqartussaaqatigiinnermik ineriartortitsinerat ingerlalluartoq nukittorsarneqassammat.

Maluginiagaq siulleq

”Ataatsimiinnermi siullermi tassani suleqatikka suliallu isumalluarnartorujussuarmik misigisaqarfigaakka”, Miiti Lynge oqarpoq. ”Uannut Naalakkersuisunullu tamarmiusunut nunat avannarliit suleqatigiinnerat nunatta nunanut allanut politikkianut pingaaruteqartuuvoq. Tamatuma pitsaasorujussuarmik ikinngutinnersumillu ingerlanneqarnera misigalugu nuannerpoq. Aamma svenskisut norskiusullu oqaatsit paasiniartarnerat nuannertarpoq, tassami svenskisut oqaatsit ilaat immaqa ilisarnarsinnaagaluarlutik tusaqqaarlugit paasinanngitsoorsinnaasarput.

Aamma nunanit allanit suleqatit Kalaallit Nunaat toqqarlugu oqaloqatigisinnaagamikku iluarisaraat malugisarpara. Tamatuma peqatigisaanik akunnitsinni pisut soqutigineqarnerat, ukiuni makkunani soqutigineqartorujussuusut uppernarsivara”, Miiti Lynge naggasiivoq.

Annertunerusumik paasisaqarusunnermi Naalakkersuisoqarfiup tamanut ammasumik mail-ia: IPAN@nanoq.gl attaveqarfigineqassaaq