Kinamiut aningaasaliisartut Nuummut pisortatigoortuunngitsumik tikeraarput

 

Kinamiut aningaasaliisartut, namminersorlutik ingerlatsisut ineriartortitsinermullu aningaasaateqarfinnit aallartitat Nuummut pisortatigoortuunngitsumik tikeraarlutik pingasunngornermi julip 3-anni tikipput. Kinamiut Kalaallit Nunaanni pissutsinik paasisassarsiorlutik tikeraarnerat eqqartuussissuserisut suliffeqarfiannit Beck Bruunimit aamma Greenland Investimit aaqqissuunneqarpoq. 

”Kinamiut Kalaallit Nunaanni pissutsinik paasisaqarfigerusuppaat, soorlu aatsitassarsiornermi pilersaarutit. Suliffeqarneq eqqarsaatigalugu sulisussatigut pisariaqartitsineq ilinniarsimassutsillu killiffia paasisassarsiorfigissavaat. Nunatsinni suliffeqarfiit ingerlanerat, aalisakkanik avammut tuniniaaneq aalisartullu atugaat” Greenland Investimi siunnersortaaneq Jenseeraq Poulsen oqarpoq nassuiaallunilu Kinamiut tikeraat suliffeqarfinnut NunaMinerals A/Simut, Air Greenlandimut aamma Tegnestuen Nuummut paasisassarsiorlutik pulaassasut, tikeraallu arfininngorpat aallaqqissapput.

Inuussutissarsiornermut, Aatsitassaqarnermut Suliffeqarnermullu Naalakkersuisoqarfik, Ilinniartitaanermut, Ilageeqarnermut, Kulturemut Naligiisitaanermullu Naalakkersuisoqarfik Kinamiunit aamma paasisassarsiorfigineqarpoq. Kinamiut aatsitassarsiornermut aamma uuliasiornermut tunngasunik paasissutissiiffigineqarput, Kalaallit Nunaat aamma Naalagaaffeqatigiinneq kiisalu Kalaallit Nunaanni ilinniartitaanikkut oqaluttuarisaaneq pillugu paasissutissiiffigineqarlutik.

 

Inussiarnersumik inuulluaqqusillunga


Oline Inuusuttoq Olsen

Toqq/direkte 345656

oiol@nanoq.gl