Kommuninut 2014-imi ataatsimoortumik tapiissutissat isumaqatigiissutigineqarput

Aningaasaqarnermut Nunamilu Namminermi pissutsinut Naalakkersuisoq Vittus Qujaukitsoq, aamma KANUKOKA-p siulittaasuata, Martha Abelsen ullumi kommuninut ataatsimoortumik 2014-imi tapiissutissat pillugit isumaqatigiissummik atsiuipput. Kommuninut ataatsimoortumik 2014-imi tapiissutit 1.147,4 mio. kr.-inik annertussuseqassapput.

Naalakkersuisut 2013-imi ukiakkut Inatsisartut ataatsimiinnissaanni siunnersuuteqassapput ernianut aningaasartuutit tamakkiisumik ilanngaatigineqartaleqqinnissaat 2014-imiit atortuulersussaq pillugu. Kommuninut ataatsimoortumik tapiissutit pillugit isumaqatigiissummi tamatumunnga tunngatillugu akileraarutitigut isertitassaagaluanut annaasassanut matussutissiisoqassaaq. Tamatumalu saniatigut innarluutilinnut taakkualu ilaqutaannut atugassarititaasut aalaja­ngersimasut ataasiakkaat pitsanngorsaavigineqarnerannut aningaasartuutissat matussutissinne­qassapput.

Illua’tungeriit nunatsinni oqimaaqatigiissumik ineriartortitsisoqarnissaa kissaatigaat. Taamaattu­mik Naalakkersuisut qitiutippaat nunatsinni kommunini sisamani tamani annertusaaneqarlunilu ineriartortitsisoqarnissaa periarfissiuunneqassasoq.  

2014-imut Aningaasanut inatsisissatut siunnersuummi Naalakkersuisut aggustimi tamanut saq­qummiunniagaanni Nuup avataani sanaartornikkut ilinniartitaanikkullu suliniutit nukittorsaavigi­neqarnissaat qitiutinneqassaaq. Suliffissanik ilinniarfissanillu pilersitsiortornerit pingaaruteqarluinnarput annertusaanissamut ineriartortitsinissamullu.

Tamatuma peqatigisaanik Naalakkersuisut kissaatigaat kommunillu oqaloqatigiittoqassasoq isumannaarniarlugu annertusaanissap ineriartortitsinissallu kommunini sisamaasuni tamani ingerlanneqarnissaa.

Oqallinneq unneqqarissumik ingerlanneqassaaq, tassanilu ilaatigut eqqumaffigineqassapput innuttaasut nunassittarnerat aammalu kommunit akornanni aningaasaqarnikkut naligiissaarineq, nassuiaasiaq hvidbogi suliarineqartoq aqqutigalugu aallartinneqarmat Namminersorlutik Oqartussat kommunillu akornanni suleqatigiinnermut isumaqatigiissutip nutarterneqarnissaa.

Annertunerusumik paasisaqarniaraanni attavigineqarsinnaapput kommitteret Peter Beck telefon 34 50 00 imaluunniit pisortaq Martha Labansen telefon 36 21 00.

__________________________

___________________________

Vittus Qujaukitsoq

Aningaasaqarnermut Nunamullu Namminermut Naalakkersuisoq

Martha Abelsen

Kalaallit Nunaanni kommunit kattuffiata siulittaasua