iPadimut iluarsartuullugu pilersaarusiamut Naalakkersuisut aqqutissiiuussipput

Tele Greenlandimit qinnuteqaatit marluusut, Qeqqata Kommuniani aamma Kommune Kujallermi atuartunut iPadinik pisinissaq pillugu iluarsartuullugu pilersaarummut ikorfartuutaasut, Naalakkersuisut pingasunngornermi 17. Juuli akuersissutigaat.

Siullermik Naalakkersuisut akuersissutigaat, atuarfiit attaveqaataata ATTAT-ip piorsarnissaanut Ilinniartitaanermut, Ilageeqarnermut, Kulturimut Naligiissitaanermullu Naalakkersuisoqarfik TELE Greenlandip neqeroorfigisinnaagaa. Nutarterinikkut qarasaasiatigut attaveqarneq annertunerulersinneqassaaq.

Aappaatut Naalakkersuisut akuersissutigaat, ATTAT-mut attaveqaammut angallattakkanut attaveqaat aqqutigalugu atuartut iPadisa attaveqarsinnaanermut, atuarfiup eqqaaniinngikkaluarlutik, periarfissiisumut TELE Greenlandip kommunit immikkut ittumik pisartagaqarnissamut neqeroorfigisinnaagai. iPadimut ataatsimut pisartagaqarnermut agguaqatigiissillugu ukiumut 500 koruunit missaanik kommuninut akeqassaaq.

Pisartagaqarnermut akiliutit Qeqqata Kommuniata Kommune Kujalliullu nammineerlutik aningaasalersussavaat. Naalakkersuisut qularnaarpaat, kommunit allat pisartagaqarnermut taamaattumut aamma pisinissamut periarfissaqassasut.

Kommunit neqeroorut atorusukkunikku, malitsigisaanik pisartagaqarnissap immikkuualuttortai pillugit inaarutaasumik TELE-mik isumaqatigiissuteqassapput.
Soorlu assersuutigalugu kommunit qanoq angitigisumik pisartagaqarnissamik piserusunnersut.

- ”Maanna kommunit taakkua marluusut TELE Greenlandip neqeroorutaa atorusunnerlugu nammineq aalajangissavaat. Akuersissutitigut taakkunuuna marluusutigut Naalakkersuisut iliuuseqarnerisigut, iluarsartuullugu pilersaarusiaq ikiorserniarlugu iliuuseqarsinnaanitsinnik periarfissanillu pilersitsivugut, iluarsartuullugu pilersaarusiaq naammassineqarsinnaaqqullugu”, Peqqissutsimut Attaveqarnermullu Naalakkersuisoq Steen Lynge oqarpoq, ilannguppaalu: - ”iPadimik iluarsartuullugu pilersaarusiaq Naalakkersuisut IKT-mik suleriusissaata piviusunngortinneqarnissaanut alloriarnerusoq, tassani internettep nunarput ataatsimoortissavaa nunarsuamioqataajartornermut sammisumik inuiaqatigiit ineriartornerat qulakkiissallugu”.

Annerusumik paasissutissanut attaveqarfigiuk: Peqqissutsimut Attaveqarnermullu Naalakkersuisoq Steen Lynge Naalakkersuisoqarfiup pisortaa Ann Birkekær Kjeldsen aqqutigalugu oqarasuaatikkut: +299 48 49 15 imaluunniit e-mailikkut: abk@nanoq.gl