Miiti Lynge: Nunat avannarliit suleqatigiinnerannit malugisat

 

Naalakkersuisut aamma Kalaallit Nunaat sinnerlugu suliassakka, sanilitsinnik suleqateqarnermut tunngasut aallartippakka. Nunat avannarliit ministeriisa suleqatigiiffiat juulip ulluisa aappaanni Visby-mi Gotland-imiittumi ataatsimiititsivoq. Ministerit suleqatigiit Nunani Avannarlerni Ministerit Siunnersuisoqatigiiffianni, katillugit qulinik ministerit siunnersuisoqatigiiffiinik peqartumi siulersuisutut atuupput. Naalakkersuisuni suleqatikka tamarmik ministerit siunnersuisoqatigiiffiannut ataatsimut amerlanerusunilluunniit suleqataapput.

Sverige-mi Aasivik

Ataatsimiinnerup Visby-mi Gotland-imiittumi pivoq, tikeraanut nunanit avannarlerneersunut tamanut ”Almedalsveckan”-ip misigitinnissaa tikeraartitsisutta svenskiusut kissaatigimmassuk. Taanna politikkikkut aasisarfiuvoq, ukiut 40-t sinnerlugit ingerlanerini juulimi sapaatit akunneranni siullermi pisartoq. Politikkikkut partiit tamarmik ataatsimiinnernik oqallitsitsinernillu aaqqissuussisarput, illoqarfitoqarsuullu itsarnisarpaluttup kaajallalluni qarmaqartup ilua allaanngilaq niuffaffissuaq, toqqit, isiginnaartitsisarfiit pisiniarfiillu aammalu allanik aliikkutassaqarfiit imaaginnavillutik.

Ilisimasallit oqallinnerat

Nunani avannarlermiut tupianni Ministerit suleqatigiit ilisimasalittut oqallinnerannut peqataavunga. Tassani innuttaasut soqutigisaqartut nunani avannarlerni suleqatigiinneq pillugu sammisassat arlallit pillugit isummavut tusarnaarsinnaavaat.

Arlallit peqataapput

Naalakkersuisut sammisaat tamangajammik aamma nunani avannarlerni suleqatigiiffimmi sammineqartarput. Nunani avannarlerni tamani piumasatsinnik angalasinnaavugut, aammalu taakkunani sulisinnaavugut ilinniarsinnaallutaluunniit. Taanna pisinnaatitaaffiuvoq akuersissuterpassuarnik pisariaqartitsiviunngitsoq. Piumagutta periarfissaqaruttalu taamaaliorsinnaavugut. Tamanna nunat avannarliit suleqatigiinnerisa inerneraa.

 

Sammisat: Atasinnaassuseq Kulturilu

Nunani avannarlermiut tupianni oqallisigisatta ilaat nungusaataanngitsumik ineriartortitsinermut tunngasuuvoq. Nunani avannarlerni suliassaqarfik taanna ataatsimoorluni politikkeqartinneqarpoq. Oqaaseq nungusaataanngitsoq aningaasaqarnermut, isumaginninnermut, avatangiisinut kulturimullu tunngasunik ilaqarpoq. Tamatuma kulturimut tunngasortaa Naalakkersuisunut pingaaruteqarpoq. Tassami inuiaqatigiit atasinnaasut meeqqatsinnut ernuttatsinnullu ingerlateqqinnissaat sulissutigilerutsigu aamma kulturimut tunngasut ilaatittussaagatsigit tassani takutinneqarpoq.

 

Oqaloqatigiinnissaq AAP, Isumaqatigiittuarnissarmi...?

Sanileriit akornanni pissutsit allarpassuit assigalugit qanorluunniit ikinngutigiilluartigigaluaraanni suut tamaasa isumaqatigiissutiginissaat ajornartarpoq. Aappaatigut ajornartorsiutit ammalluinnartumik oqaloqatigiissutigineqarsinnaanerat pissutigerpiarlugu ikinngutigiilluartoqartartoq oqartoqarsinnaavoq. Ilaanneeriarlunimi ataatsimut aaqqiissutissamik nassaartoqarsinnaasarpoq.

Ammasumik niueqatigiinneq: Aamma kalaalimernit...?

Oqareernittut nunani avannarlerni ammasumik niueqatigiissinnaavugut, nunani avannarlerni innuttaasutut piumasatsinnik angalasinnaalluta, taamaakkaluartorli aamma ajornartorsiutinik pilersoqarsinnaavoq. Kalaallit kilisaataatitsinni inuttat Islandimut talikkaangamik tamanna misigisarpaat. Assersuutigalugu Island aqqusaarniaraanni arferit neqaannik nikkuminernik , umiarsuarmi nerisassanik nassartoqarsinnaanngilaq. Islandimi nersutit neqaannut oqartussaasut uisakajaalivittarput, tamannalu uatsinnut eqqumiiginarsinnaavoq, tassami islandimiut arferit neqaat siatat mamarilluinnarsinnaasarpaat.

Tamanna nunani avannarlermiut naapikkaangatta nunani avannarlerni killeqarfiit pillugit oqaluuserisinnaasatsinnut assersuutissaalluarpoq, kisiannili aamma soorunami suliaavoq, Naalakkersuisut nammineerluta Islandimi nunanilu avannarlerni allani ikinngutitsinnut oqaloqatigiissutigisassarput, tamannalu aamma saqqummiutereerparput. 

Maluginiakkat siulliit

Nunani Avannarlerni Ministerit Siunnersuisoqatigiiffianni ataatsimeeqataaqqaarninni suleqatikka nuannarillualerpakka, suleqatigiinnerullu ingerlaqqinnissaanut qilanaarpunga. Maannalu qularinnginnerulerpara, Kalaallit Nunaanniit tassani oqaloqatigiilluarsinnaasatsinnik suleqatissaqarluta. Tamatuma peqatigisaanik nunat avannarliit suleqatigiinneranni politikkikkut immersuinissamut suliniuteqarnissamullu pitsaasunik periarfissaqarpugut, misigisimavungalu aallartilluareerluta, aammalu tullissaanut qilanaarpunga, suliat pissanganartut malinnaaffigisussaagakkit.

 

Annertunerusumik paasisaqarusunnermi Naalakkersuisoqarfiup tamanut ammasumik mail-ia: IPAN@nanoq.gl attaveqarfigineqassaaq.