2013-2014-imi piffissat tuttunik umimmannillu piniarfiusussat

 

Naalakkersuisoq Karl Lyberth aalajangerpoq tuttunniarnermi umimmanniarnermilu maleruagassat atuuttut 2013-2014-mi piniarnissami ingerlateqqissallugit. Biologit inassuteqaataat tusarniaanermilu akissuteqartut malillugit ukunannga allannguuteqarput. 

 

Tuttut

1.       Aqutsiveqarfik 2 (Sisimiut-Kangerlussuaq): Ukiukkut upernaakkullu tuttunniarneq inuussutissarsiutigalugu sunngiffimmilu piniartunut matuneqarpoq.

2.       Aqutsiveqarfik 9 aamma 10 (Olrik Fjord, Prudhoe Land kiisalu Inglefield Land): Allannguutaasinnaasut ukiukkullu piffissami nunaminertamilu killilikkami tuttunniarneq piniartut oqaloqatigalugit eqqartorneqarsinnaapput.  

 

Tunngavilersuutit: Kalaallit Nunaata kitaani ukiukkut upernaakkullu tuttunniarneq ukiuni kingullerni qulini tuttorpassuaqarfiusuni tuttut ikilisarnissaannut ingerlanneqarsimavoq. Tamanna anguneqaleriartorpoq 2013-mi 2014-milu Kalaallit Nunaata kitaani ukiukkut upernaakkullu tuttunniarneq inassutigineqarani. Ukiukkut upernaakkullu tuttunniarneq akiliisitsilluni piniartitsinermi taamaallaat inassutigineqarpoq pisarineqartartut ikittuinnaasarmata kiisalu inuussutissarsiutigalugu sunngiffimmilu tuttunniarneq Avanersuarmi piniarfinni tamani (Inglefield Land, Olrik Fjord kiisalu Prudhoe Land) inassutigineqarluni.

 

Erseqqissaatigineqarpoq qamuteralaat, ATV-t kiisalu qamutit motoorinik ingerlatillit allat tuttunik malersuinermi piniutigissallugilluunniit inerteqqutaalluinnartoq.

 

Umimmaat

3.       Sisimiut Maniitsullu umimmaqarfianni: Ukiukkut upernaakkullu umimmanniarneq januarip aallaqqaataa aallarnerfigalugu februarip naanissaata tungaanut 2014-imi ingerlanneqarsinnaavoq. Umimmaqatigiit misissorneqassappata / kisinneqassap-pata umimmanniarneq februarip aallaqqaataani aatsaat aallartissinnaassaaq. Tamanna 2013-mi ukiakkut nalunaarutigineqarumaarpoq.

4.       Avanersuarmi aamma Ittoqqortoormiini umimmaqarfiit: Allannguutaasinnaasut ukiukkullu piffissami nunaminertamilu killilikkami umimmanniarneq piniartut oqaloqatigalugit eqqartorneqarsinnaapput.

5.       Ivittuut umimmaqarfiani: Angutivissanik imaluunniit arnavissanik equngasumik pisaqartoqartarnera pillugu ajornartorsiutip aaqqinnissaanut immikkut suiaassusilikkanik umimmanniarneq eqqunneqarpoq. Tamanna isumaqarpoq umimmattassaq sorlermik suiaassusilik pisarineqarsinnaanersoq akuersissummi allaqqariissasoq.

 

Tunngavilersuutit: Umimmaqarfinni tamani ukiukkut upernaakkullu akiliisitsilluni umimmanniartitsineq inassutigineqarpoq pisarineqartartut ikittuinnaasarmata.

 

Erseqqissaatigineqarpoq qamuteralaat, ATV-t kiisalu qamutit motoorinik ingerlatillit allat umimmannik malersuinermi piniutigissallugilluunniit inerteqqutaalluinnartoq. Qamuteralaat, ATV-t kiisalu qulimiguullit atorlugit umimmannik ungoorinissaq qinnutigineqarsinnaavoq.

 

 

Paasissutissat annertunerusut allaffimmi pisortaagallartumut Peter Løvstrøm-imut tlf. Nr. 34 53 42, pelo@nanoq.gl, saaffiginninnikkut pissarsiarineqarsinnaapput.                      

 

 

Ilanngussaq 1: Nunap immikkoortuini piniarnissamut piffissat pisassiissutillu.

Ilanngussaq 2: Kalaallit Nunaata kitaani 2013/2014-mi tuttunut Piniarfik 1-11.

Ilanngussaq 3: Kalaallit Nunaanni 2013/2014-mi umimmaqatigiit.