Naalakkersuisut Siulittaasuat CSR Greenlandimik ataatsimeeqateqarpoq

 

Naalakkersuisut Siulittaasuata aamma CSR Greenlandip akornanni ataatsimiinnermut ilisarnaataavoq, inuiaqatigiit ineriartorteqqinnerannut pingaartitatut pitsaasutut inuttut inooqataanikkullu akisussaassutsip (Social Responsibility) suli aallunneqarnissaa pillugu isumaqatigiittoqarmat, annertunerusumillu suleqatigiinneq aallartinneqarluni.

Ataatsimiinnermi CSR Greenlandimit oqaatigineqarpoq, Kalaallit Nunaanni atasinnaasumik ineriartornerup qulakkeerneqarnissaa siunertaralugu Naalakkersuisunik nutaanik sutigut tamatigut suleqatiginnilluarusullutik Naalakkersuisullu Siulittaasuata kaffillersinnaanera nuannaarutigalugu.

Naalakkersuisut Siulittaasuata, Aleqa Hammondip, CSR Greenlandip sulinera uppernarsarpaa, pingaartitallu, CSR Greenlandimit ingerlanneqartut aamma Naalakkersuisunut pingaaruteqartuuneri isumaqatigalugit nalunaarutigalugu. Naalakkersuisut Siulittaasuat, Aleqa Hammond oqarpoq:

”Isertuannginneq, ammasumik periuseqarneq, avatangiisinik eqqarsaatiginninneq, inoqatinut inuttut inooqataanermilu akisussaaneq aamma piujuartitsinermik tunngaveqarneq tassaapput tamarmiulluta ataatsimoorluta, Nunatta siunissaa pillugu naammassiniakkatsinni suliassanik kivitsisinnaanitsinnut pingaartitagut.”

Naalakkersuisut Siulittaasuat nangilluni oqarpoq:

”Taamaattumik CSR Greenlandimik suleqateqarneq uatsinnut pingaartuuvoq, Nunatta siunissaanut pingaarutillit pingaartitat Nunatsinni suliffeqarfiit suleqatigeqqissaarlugit aamma ataqatigiissarnissaat qulakkeerniarlugu”.

CSR-imi (Corporate Social Responsibility) isumaginninnerup, avatangiisinut tunngasut aamma ileqqorissaarnermut tunngasut iluanni suliffeqarfiit kajumissutsiminnik ingerlataqarnerat sammineqarpoq. Tamatumani aamma CSR Greenlandimut pingaarpoq, inuttut inooqataanikkullu unamminartut annertuut Nunatsinni sammineqarnissaat kiisalu, pitsaasunik iluaqutaasunillu peqatigisaqalerluni aamma suliffeqarfinnut tunngatillugu, aatsitassarsiornissamut aallartisalersumut pilersuisoorusuttunut, CSR-imi piumasaqaatigineqartunik Nunatsinni inuussutissarsiortut suliaqalernissaannut piareersarlugit.

 

Inussiarnersumik inuulluaqqusillunga

Julie Rademacher

Toqq/direkte 345161

jura@nanoq.gl