Naalakkersuisut Siulittaasuata Aleqa Hammondip Aasiaat 250-iliisut pilluaqquai

Aasiaat 250 aar


Naalakkersuisut  Siulittaasuat Aleqa Hammond Aasiaat 28. juli 2013 ukiunik 250-nngortorsiornerannut pisortatigoortumik qaaqqusatut peqataasoq, Aasiaat Aasiammiullu nalliuttorsiornerannut pilluaqqussuteqarpoq.

Aleqa Hammond oqarpoq:

”Aasiaat ukiut 250-it matuma siornagut allarluinnarnik unammigassaqarfiulluni illoqarfiusimavoq inunnillu ullumikkumut naleqqiullutik allarluinnaasunit aamma tunngaviligaasimalluni. Taamakkaluartorli Aasiaat tunngaviligaammalli innuttaasut taamanernit ullumikkumut illoqarfimminnik nunaqarfittaminnullu tunngatillugu piumassuseqarlutik ingerlatseqataapput siunissamut ajunngitsunik takorluugaqarlutik, periarfissanillu nukissaqarluarlutik atorluaasuullutik. Aasiaat nunatsinni qitiusumik inissisimaffeqarpoq, taamaattuassaarlu pingaartumik aalisarnermik, ilinniartitaanermik, aatsitassarsiornermik minnerunngitsumillu takornaqarnermik ineriartortitsinerit eqqarsaatigissagaanni. Aasiammiut inutsialaapput tikikkuminartuullutik oqaluttuarisaanikkullu ileqqunik pingaartitanillu ataqqinnillutik nukittuumik attassiajuartuusut. Tamanna ataatsimoorfissatut maligassaavoq. Aasiaat Aasiammiullu ullorsiorneranni uummaammit pisumit pilluaqqungaarpakka ullullu ullorsiorfiit nuannaarlutik pilluarlutillu atussagaat kissaappakka.”


Ullorsiornermit assilisat takukkit. 


Inussiarnersumik inuulluaqqusillunga

Naalakkersuisut Siulittaasuat  Aleqa Hammond



Attavigisassaq: Else Olsvig /Namminersorlutik Oqartussat Tusagassiiviat, mobil: 534242, eols@nanoq.gl