Peqqissaasunngorlaanut juunip 27-ani 2013 oqalugiaat

Nyuddannede sygeplejersker

Peqqissutsimut Attaveqarnermullu Naalakkersuisup Steen Lynge-p Peqqissaasunngorlaanut juunip 27-ani 2013 oqalugiaataa

Asasakka peqqissaasunngortut

Ilinniakkassinnik naammassinninnissinni uummammit pisumik pilluaritsi!

Ullumikkut ulloq nalliuttorsiorfiuvoq! Immikkut tamassi soraarummeernissinnut uppernarsaaserneqarneq angusaq annertooq pillugu nalliuttorsiutaassaasi.

Ilinniarfissi Peqqissaanermik Ilisimatusarfik peqqissaasut qulit ilinniarnerminnik naammassinninnerat pillugu pilluaquarput – nunatta peqqinnissaqarfiullu atorfissaqarteqaasi!

Ilissi quliullusi maaniittusi immissinnut tulluusimaarutigisallusi pissutissaqarluarpusi. Ilinniarneq atuagarsornikkut suliffimilu ilisimasassat tungaasigut piumasaqaatitaqaqisoq naammassivarsi. Nalunaaquttap akunnerpassui ilisimatusarfimmi atuarnermut qarasaasiarsornermut peqqinnissaqarfimmilu sulinermik sungiusarnermut atorsimavasi.

Ilinniaqatigiillusi ilinniakkassinnik naammassinissinni angusasi agguaqatigiissillugit qaffasinnerit akornanniipput. Pilluaritsi. Kakkaqaasi!

Atorfissaqartinneqaqaasi! Tamannami ilissi nalunngereerunnarsivarsi. Paasisakka naapertorlugit peqqinnissaqarfimmi tamassi atorfininnissarsi qulakkeerneqareerpoq ilasilu ataasinngorpat sulileriissapput.

Innutaasut peqqinnissaqarfimmik naliliisarnerisa, inuttut misilittakkanik tunngaveqarnera qularutissaanngilaq. Innuttaasut peqqinnissakkut sullissisunik naapitsisarnerat, pitsaasumik ajortumilluunniit pineqartutut misiginermut aalajangiisuugajuttarpoq.

Kinalu peqqinnissaqarfimmut saaffiginninnermi naapitassaasarpa? Naapitassat siulliit tassaagajupput ilissi peqqissaasut. Ilissimi assigiinngitsutigut tassaavusi peqqinnissaqarfiup kiinnernera uummataa assaalu kissartut.

Peqqinnissaqarfimmi sullissisut innuttaasoq qitiutillugu sullissinissaat, Naalakkersuisut anguniagassatut siunniussaraat. Ilissi maani issiasusi anguniagassatut siunniussap tamatuma anguneqarnissaanut pingaarutilimmik inissisimavusi. Sulinersi ilinniarnissitut piumassuseqarnermik pikkorissutsimillu sunnerneqarpat, nakorsiarfimmi naapinnissarsi qilanaarnassaaq.

Taama oqaaseqarlunga pilluaqqoqqippassi siunissamilu sulilluarnissamik ajunngitsunillu tamanik kissaallusi!

Qujanaq!