Kalaalimineerniarfinni tuniniarneqarsinnaasut amerlipput

Naalakkersuisut ullumi ataatsimiinnerminni aalajangerpaat Suliassaqarfiit inuussutissaleriffiusut pillugit Namminersornerullutik Oqartussat nalunaarutaat nr. 21-mi, 27. juli 1998-meersumi § 26-mi imm. 8-miit 2013-mi juulip aallaqqaataanit 2014-p naanissaata tungaanut immikkut akuersisoqassasoq, taamaasilluni kalaalimernit tunisassiarineqarsimasut ilaannik kalaalimineerniarfinni tunisaanissaannut akuersisoqarluni.

Immikkut akuersinerup kingunerisaanik 1. Juli 2013 aallarnerfigalugu nerisassat suliarineqarsimasut uku tunineqarsinnaalerput:

  • Aalisakkat neqillu panertitat
  • Aalisakkat neqillu qerisut
  • Aalisakkat neqillu tarajortikkat

Tunisassianik kalaalimineerniarfinniit tunisinernut atatillugu nerisassat isumannaatsuunissaat aamma inuit peqqissuunissaat siunissami ungasinnerusumi qulakkeerniarlugu, taava naalakkersuisoqarfimmi uumasunut nakorsaqarnermut immikkoortortaq nalunaarutip atuuttup nutarterneqarneranut atatillugu nutaanik maleruagassaliussaaq, taamaasilluni immikkut akuersineq naappat maleruagassat taakku atuuttuulerlutik.