Visit Greenlandimi ileqquusumik ataatsimeersuarneq

Visit Greenlandip 2012-mut ukiumut nalunaarutaa ataatsimeersuarnermi akuersissutigineqarpoq. Ukiumi tassani pissutsit marluk ilisarnaataapput: Visit Greenlandimi pisoqarfiulluarnera – kiisalu annikikkaluamik, 386.362 kroninik, amigartoortoqarnera.

Ileqquusumik ataatsimeersuarnermi piginnittut Namminersorlutik Oqartussat sinnerlugit Naalakkersuisut Siulittaasuat Aleqa Hammond peqataavoq. Oqaaseqarnermini takornariaqarnermik inuussutissarsiutip Kalaallit Nunaannut annertuumik pingaaruteqarnera erseqqissaatigivaa:

”Takornariaqarnermik inuussutissarsiut nunatsinnut pingaaruteqarpoq, Naalakkersuisuniillu inuussutissarsiummi tassani annertuutigut ineriartorfissaqartoqarnera takusinnaavarput. Kalaallit Nunaat asseqanngitsumik pinngortitaqarpoq taamatullu takornarianut immikkuullarissunik misigisaqartitsisinnaalluni. Periarfissap tamatuma atorluarneratigut suliffissanik inuiaqatigiinnilu siuariartornermik pilersitsisoqassaaq.”

Namminersorlutik Oqartussat takornariaqarnikkut periusissiaanni tigussaasunik arlalinnik anguniagaqartoqarpoq, taakkununngalu takornariat amerlisarneqarnissaat aammalu takornariartitsinermi ataatsimut isigalugu siuariartortitsinissaq ilaapput. Ukiumut nalunaarummi aqutsisut nalunaarutaanni Visit Greenland A/S-ip Namminersorlutik Oqartussat nuna tamakkerlugu takornariaqarnermut periusissiaanik naammassinninniarlutik qanoq sulissuteqarnerat erserpoq. Tamanna ilaatigut nunami takornariaqarnermut tunngasutigut paasissutissanik takussutissanillu katersuinikkut kiisalu takoqqusaarinikkut takornariaqarnermilu ersarissaanikkut siuarsaanikkullu pivoq.

Suliaq Aleqa Hammondimit iluarisimaarneqartoq. Imalu oqarpoq:

”Visit Greenland A/S-imi Namminersorlutik Oqartussat nuna tamakkerlugu takornariaqarnermut periusissiaanik naammassinninniarlutik sulissuteqarnerat nuannaarutigaarput. Aatsaammi ataatsimoorussamik iliuuseqarnitsigut anguniakkat angusinnaavagut. Ingerlatseqatigiiffiup sulissuteqarneratigut angusassat malinnaaviginissaat Naalakkersuisut qilanaarivaat.”

Visit Greenland A/S-mi siulersuisuni ilaasortanut Kenneth Høegh ilannguppoq. Kenneth Høegh siulersuisuni ilaasortatut sulinermik misilittagaqartuuvoq takornariaqarnermilu siuarsaanermik suliaqartuusimalluni. Ilaatigut Qaqortumi Niuernermik Ilinniarfimmi Arctic Guide-tut ilinniagaqarfimmi ilinniartitsisuusarsimavoq.


Visit Greenland A/S-mi siulersuisut tassaapput:
• Karin Egede (Siulittaasoq)
• Anette Lings
• Salik Hard
• Ole Andersen
• Kenneth Høegh