Allagartartaartussat

Ilinniarnertuunngorniarfinni kalaallisut ilinniartitsisut ilinniaqqittut allagartartaarnerat

Pingasunngorneq 5. juni 2013, nal. 13.00 Ilimmarfimmi ini nr.01 – imi Ilinniarnertuunngorniarfinni kalaallisut ilinniartitsisut tallimat Akademisk Diplomuddannelsemik ilinniaqqinnerminnik allagartassatik tigussavaat.

Ilinniaqqinneq Akademisk Diplomuddannelse aaqqissuussaavoq ilinniarnertuunngorniarfinni ilinniartitsisunut, Ilinniarfissuarmi atuarsimasunut. Ilinniakkami oqaasilerineq, atuakkialerineq kulturilu immikkut sammineqarput, taakkulu ataanniipput aamma tusagassiuutilerineq. Ilinniaqqittut ukiut pingasut ingerlaneranni sulinermi saniatigut ilinniarnertik ingerlassimavaat.

Ilinniartut ilinniarnerminni Ilinniarnertuunngorniarfimmi kalaallisut ilinniartitsinermi sakkussaminnik inerisaasimapput.

Ilinniaqqittut ilaat ukiut 25-it, 15-it tallimallu sinnerlugit Ilinniarnertuunngorniarfinni kalaallisut ilinniartitsisutut sulillutik misilittangaqareerput.

Siorna aggusti 2012-mi Ilinniarnertuunngorniarfimmi nutarsaaneq atulerpoq, tassungalu atatillugu ilikkagassatut pilersaarutit nutaat atuutsinneqalerput, ilaatigut sammineqarluni atuartitsissutit akimorlugit ingerlataqarluni suleqatigiinneq, atuartullu qitiutillugit atuartitsineq. Taakku siunertat ilinniakkami ilaapput.
Ilinniaqqinnerup sinaakkutaa Ilisimatusarfiup ataani Ilinniarnermik ilisimatusarfiup ilinniartitsisunik ilinniartitseqqittarnerata ilusaatut ilusiligaavoq.

Paasisaqaqqinnerorusukkaanni attavigineqarsinnaapput Eva Møller Thomassen tfl: 34 98 84 imaluunniit Lotte Sandberg Kjær, ilinniartitaanermut nakkutilliisoq, Ilinniartitaanermut, Ilageeqarnermut, Kultureqarnermut Naligiissitaanermullu Naalakkersuisoqarfik; oqarasuaat: 34 57 23