Qaqortumi Mittarfik

Qaqortumi mittarfik nutaaq pillugu misissuineq Naalakkersuisunit nanginneqarpoq.

Naalakkersuisut ulloq junip 20-iani 2013 ataatsimiinnerminni Kujataani illoqarfiit anginersaanni mittarfimmik nutaamik pilersitsinermut atatillugu periarfissanik unamminartunillu misissueqqaarnerit nanginniarlugit aalajangerput.
-Mittarfik nutaaq Kujataanut, Kujataaniit Kujataanilu ilaasunik angallassinermut toqqammavinnik pitsaanerusunik pilersitsissaaq. Tamanna taamaattumik Kujataanut nunap immikkoortuanut aamma innuttaasunut ataasiakkaanut iluaqutaasussaavoq, taamatut oqarpoq Peqqissutsimut Attaveqarnermullu Naalakkersuisoq Steen Lynge.
Steen Lyngep tapersersuigaluarluni erseqqissarpaa naqqa tikillugu misissuinerit tunuliaqutaralugit aalajangiisoqassasoq, taamaattumik inaarutaasumik aalajangiinissaq suli ungasittoq:
-Naalakkersuisut aalajangiinissaat sioqqullugu ilisimasat naammattut pisariaqartinneqarput. Iluaqutit, ajoqutit periarfissallu allat misissorneqassapput. Minnerunngitsumik tamanna inuiaqatigiit aningaasaqarnerannut qanoq isumaqarnersoq paaserusupparput. Qaqortumi mittarfissamik misissuinerup saniatigut Nunatsinni tamarmi mittarfeqarfiit siunissami aaqqissugaanerannut ataatsimut pilersaarusiortoqassaaq.
Qaqortup eqqaani mittarfik pillugu misissueqqissaarnerit inerneri 2015-mut aningaasanut inatsimmut ataatsimoortumik pingaarnersiuinermi ilanngunneqarsinnaasunngorlugit piareersimanissaat naatsorsuutigineqarpoq.


Paasissutissat annertunerusut pillugit attavigisassaq: Peqqissutsimut Attaveqarnermullu Naalakkersuisoq Steen Lynge naalakkersuisumut allattaagallartukkut Ove Frank Heilmann oqarasuaat: +299 34 66 63 imaluunniit e-mail: ovhe@nanoq.gl