Kulturimut tunngasunik nersornaasiineq

Nersornaat 210613

Kulturikkut Nersornaat Jørgen Kristensen, Ilulissat, Qaanaami Aalisartut Piniartut Peqatigiit (QAPP), aammalu N.A.I.P tunniunneqarpoq

Inuiattut Ullorsiornermi juunip 21-ani 2013 Namminersorlutik Oqartussat Kulturikkut Nersornaataat tunniunneqarpoq.

Ukioq manna Kulturikkut Nersornaat Jørgen Kristensen, Ilulissat, Qaanaami Aalisartut Piniartut Peqatigiit (QAPP), aammalu Nuummi Aliikkusersuisartut Isiginnaartitsisartullu Peqatigiiffianut (N.A.I.P) tunniunneqarpoq.

Naalakkersuisut aalajangersimavaat Kulturikkut Nersornaat peqatigiiffinnut marlunnut inummullu ataatsimut kalaallit qangaanerusoq piniariaasianut, nammineq kamumissuseq tunngavigalugu isiginnaartitsisartunut aammalu tigussaanngitsumik kingornussanut immikkut suliniuteqarluarsimasunut tunniunneqassasoq.

Jørgen Kristensen pillugu ilaatigut Naalakkersuisunut ilaasortaq Nick Nielsen imatut oqarpoq:

-       Jørgen Kristensen ”Avannaata Qimussersua”-ni Nunatta avannaani ukiut tamaasa sukkaniutsitsisartumi nersorneqarluartuullunilu ataqqineqarluartuuvoq. Taanna qimussimik angalaneq sukkaniuttarnerlu eqqarsaatigalugit annertoorujussuarmik suliniuteqartuusimavoq, aammalu ukioq manna Avannaata Qimus-sersuani tallimassaanik ajugaanermigut maannamut angusarissaarnerpaalluni. Immikkut oqaatigineqassaaq, maannakkut nunatsinni qimuttunik atuinerup annikilliartorfiani qimmiminik paarsilluartuummat qimminillu sungiusaaneq pingaartilluinnarmagu. Nammineq qimmimilu suleqatigiilluarnissartik pingaartittuuaa. Qimmit namminneq kajumissutsiminnik qimukkusussappata suleqatigiilluartoqartariaqarpoq. Piumassuseq kajumissuserlu tamaasa ataatsikkut pigai, sunngiffimminilu sammisani inuuneriinnalersimallugu, tamannalu Nunatsinni qimussernikkut tusaamasaassutigilersimallugu.

Qaanaami Aalisartut Piniartut Peqatigiit (QAPP) pillugit ilaatigut Naalakkersuisunut ilaasortaq Nick Nielsen oqarpoq:

-       Peqatigiiffiup Inughuit qangaaniilli piniariaatsit atorlugit inooriaasiat ingerlateq-qinniarsimavaa. Pingaartumik qajaq atorlugu qilalukkanik qaqortanik qernertanil-lu piniarneq eqqarsaatigalugu. Piniartut qangaaniilli piniariaatsit, inuiaqatigiinnilu uumasunik nungutsaaliuilluni atuinissamik pingaartitsineq tunngavigalugit piniarnissamut maleruagassat attatiinnarsimavaat, imminnullu sakkortuumik piumaffigisimallutik. Qangali ileqquusut aallaavigisarsimavaat, maannalu nunat killiit annertuumik sunniuteqarfianni kulturitoqqaminnik attassiinnarsinnaasimanerat immikkut maluginiagassaavoq. Piniartutut aalisartutullu inuunerminni piujuartitsinissaq sungiusimaannarpaat.

Nuummi Aliikkusersuisartut Isiginnaartitsisartullu Peqatigiiffiat (N.A.I.P) pillugit ilaatigut Naalakkersuisunut ilaasortaq Nick Nielsen imatut oqarpoq:

-       Peqatigiiffik akissarsiaqaratik nammineq kajumissutsimik ingerlatsisunit inger-lanneqartoq kulturikkut maani nunatsinni nunanilu allani immikkuullarissuusutut ilisimaneqalersimavoq. Ukiuni kingullerni ingerlatat assigiinngiiaartut innuttaasunit nuannarineqarluartut, aammalu meeqqanik inuusuttunillu akuutitsiffiusut ingerlatarilersimavaat. Immikkut ilisimaneqaatigilersimavaat peqatigiiffiup qitinnermik nipilersornermillu ingerlatsinera ineriartortitsineralu, innuttaasunit nuan-narineqaqisoq. Qanga inuuneq Canadami naggueqativut suleqatigalugit nammineq kajumissuseq tunngavigalugu isiginnaartitsissutissatut isiginnaartitsissutis-siarisimavaat, aammalu kulturikkut ingerlatatik Nunatta sinnerani ilisarisimaneqaatigilersimallugit.

Naalakkersuisut sinnerlugit Naalakkersuisunut ilaasortaq Nick Nielsen diplominik nersornaatillu aningaasartaanik tunniussisuuvoq.

Oqalugiaat tamaat uani takujuk

Paasissutissanik amerlanerusunik pissiarsiniaruit, attavigiuk:

AC Fuldmægtigi Pia Lynge, oqarasuaat +299 34 5706