LEV aamma Inooqat

LEV

Naalakkersuisup Martha Lund Olsen-p LEV aamma Inooqat suleqatiginiarlugit aallarnerpaa

Ilaqutariinnermut Inatsisinillu Atuutsitsinermut Naalakkersuisup Martha Lund Olsen-p ullumi Landsforening LEV (Inuit ineriartornermikkut kinguarsimasunut ilaqutaasunut soqutiginnittunullu Danmarkimi peqatigiiffik) aammalu Inooqat (Kalaallit Nunaanni inuit ineriartornermikkut kinguarsimasut ilaqutaasalu peqatigiiffissaat) ataatsimeeqatigivai.

Ataatsimeeqatigiit isumaqatigiipput Ilaqutariinnermut Inatsisinillu Atuutsitsinermut Naalakkersuisoqarfik, LEV aamma Inooqat suleqatigiillutik inuit ineriartornermikkut kinguarsimasunut ilaqutaasunullu siunissami nunatsinni kommunerujussuarni sisamani immikkut isumasioqatigiisitsinissaq suleqatigiillutik aaqqissorniarlugu.
Siunissami suleqatigiinnissaq peqatigiiffissamut Inooqat-mut nukittorsaaqataanissamut tunngaviussaaq, aammattaaq siunissami innarluutilinnut inatsisit nutarternissaanut LEV ilaatinneqarumaarpoq.

”Kalaallit Nunatsinni innarluutillit atugarisaasa pitsanngorsarnissaat pisariaqaqaaq. Siunissami LEV –mi misilittakkat aammalu ukiorpassuarni ilisimasarilersimasaasa atorluarnissaat qilanaarnarput. Aammattaaq Inooqat aamma IPIS pissutsinut pitsanngorsaanissamut qanimut suleqatiginissaat qularutissaanngilaq” taamatut oqarpoq Martha Lund Olsen.


Attavissaq: Naalakkersuisup allatsigigallagaa, Elisabeth P. Wille. Tlf. 34 57 14, E-mail: elwi@nanoq.gl

Assimiittut: Benny Kokholm (Inooqat), Naalakkersuisoq Martha Lund Olsen, Kattuffiup LEV-ip siulittaasua Sytter Kristensen, Pauline Abelsen (Inooqat), konsulent, LEV, Dan R. Schimmel.