Kanukoka Naalakkersuisullu isumaqatigiipput

Kanukoka delegeret

Naalakkersuisut kommunellu suleqatigiinnertik nukittorsarusuppaat.

Naalakkersuisut Siulittaasuata Aleqa Hammondip aamma Aningaasaqarnermut Nunamullu Namminermut Naalakkersuisup Vittus Qujaukitsup Kanukokamut Aallartitat Ilulissani ataatsimiisinneqarnerannut peqataanerminni kommuneqarfinni sisamaasuni borgmesterit aamma ataatsimeeqatigaat tallimanngornermi 14. Juni 2013.

Siunissami suliassat annertuut unammillernartullu ataatsimoorullugu suliarinissaat pillugu suleqatigiinneq nukittorsarneqartariaqartoq ataatsimeeqatigiiittut isumaqatigiissutigaat. Aaatsimeeqatigiittut taamaattumik isumaqatigiipput suliassat pingaaruteqartut aallartinneqartariaqartut.

 Vittus Qujaukitsoq:

 "Oqaloqatigiinnerit pitsaasumik unneqqarissumillu ingerlanneqarput. Aningaasarsiorneq qulakkeerniarlugu suliniutit assigiinngitsut aallartisarneqarnissaat kiisalu ukiumoortumik aningaasaliissutaasartut eqqarsaatigalugit nammineernerulernissarput anguniarlugu suliniuteqarnerit tunngaviusumik isumaqatigiissutigaavut. Pisortat sullissinerat nutarsarneqartariaqarpoq. Suliassat pitsaanerusumik naammassineqartarnissaat qulakkeerneqartariaqarpoq suliassanillu tulleriiaarinitta kinguneri nalilersorneqartariaqarlutik. Sullissinerup aningaasartuutaaneranut eqqumanerusariaqarnerput isumaqatigiissutigaarput. Kanukoka kommuneqarfiillu pisortat sullissineranni peqataalluinnartuummata pisortat sullissinerisa assigiinngiiarnerisa oqaloqatigiissutigisariaqarnerat aamma isumaqatigiissutigaarput.”

Kanukokap Siulittaasua Martha Abelsen:

 ”Naalakkersuisut oqaloqatiginissaat pillugu Kanukoka kommuneqarfiillu annertuumik suliaqarput. Kommunenik allanngortiterinermi suliat kiisalu kommunet aningaasaqarnikkut unammillisagassaat pillugit Naalakkersuisut paasitinneqarnissaat Kanukokamut kommunenullu  pingaaruteqarpoq. Kommunet Namminersorlutillu Oqartussat  Aningasatigut Missingersuusiortarnikkut Suleqatigiinnissamik Isumaqatigiissutaata, kommuneqarfinni aningaasaqarnikkut nalimmassaanermik inatsisiliornikkullu nutarsaanermik nassataqartoq  pitsaasumik oqaluuserineqarpoq. Namminersorlutik Oqartussanit kommuneqarfinnut akisussaaffinnik nussuinerit siunissami sukkanerusariaqarput, tamannalu pissaaq kommunalbestyrelsenik qanimut suleqateqarnikkut. Kommuneqarfiit Naalakkersuisullu akornanni oqaloqatigiinneq qaninnerujussuarmik ingerlalerpoq, tamatuma kingunerisaanik kiisalu siunissami aningaasaqarnikkut sinaakkusersuinermi allorassaaqatigiinnissaq anguniarlugu akulikinnerusunik naapeqatigiittarnissarput isumaqatigiissutigaarput.”

 

Attavissat/ For yderligere oplysninger kontakt: Marthannguaq Rasmussen, email: mar@nanoq.gl  tlf.:

586116 / Svend Møller email: svmo@kanukoka.gl tlf.: 487956