KNAPK-p ulloq 12. juni 2013 nalliuttorsiornerani oqalugiaat

Aleqa Hammond:

Asasakka Kalaallit Nunaanni aalisartut piniartullu taamatullu Kattuffimmi siulersuisuunerit ulluinnarnilu aqutsisuusut.

KNAPK-p ukiuni 60-ini kattuffittut piusimanerani nalliuttorsiornissinni pilluaritsi. Nuannaarutigeqaara KNAPK-mi siulersuisuunerit siulittaasuata, kattuffiup nalliuttorsiornissaani matumani oqaaseqaqqummannga. Soorunalimi tamanna tulluusimaarlunga ilassilluarpara.

Nalliuttorsiornissinni pilluangaaritsi - Kattuffittut ukiuni 60-ini piusimaneq imaannaanngitsuuvoq, angusarlu tulluusimaarutigineqaannarani aamma takutitsivoq ataatsimoorfeqarnermik nunatsinni aalisartut piniartullu pimoorussillutillu soqutigisaqartuusut.

Ukiut ingerlaneranni unamminartorpassuit aammalu suliniuterpassuit peqataaffigisimagisi nalunngilara. Inuussutissarsiutigisarsi nunarsuarmi inuussutissarsiutit artornartut navianarsinnaasut annersaannut ilaasoq oqaruma sallussagunanngilanga. Nalunngilaralu tamanna KNAPK-mi siulersuisunut ilaasortaasartut ilisimaarilluinnarlugu suliniuteqarnerminni pingaartilluinnarlugu eqqummaariffigiuaannaraat.

Suliat Naalakkersuinikkut suleqataaffigisimasasi amerlaqaat. Oqaatigisinnaavara naleqqussartuarneq ilisimaarilluinnarissi Naalakkersuisuni nalunnginnatsigu taamaammallu aamma suleqatigalusi siunissaq eqqarsaatigalugu suleqatigiinnissatsinnut Naalakkersuisuni peqataanissarput ammaffigigipput matumuuna nalunaarutigissallugu Naalakkersuisut Siulittaasuattut oqaatigereerusuppara.

Pisariaqarpormi Kalaallit Nunaanni inuussutissarsiutit pingaarnersaata ineriartorteqqinnissaanut suliniutit pineqartillugit inuussutissarsiuteqartut peqatigalugit Naalakkersuinikkut pissutsit aaqqissuusseqatigiiffigissallugit pissusissamisuuginnarmat.

Naalakkersuisooqatigiit suleqatigiinnissaminni isumaqatigiissutigisaanni aalisarnermit, piniarnermit nunalerinermillu pisuussutinit atuinitsinnit annertoorujussuarmik pingaartitsinermik imaqarpoq. Naalakkersuisooqatigiinnimi qularinngilarput Nunatsinni immitsinnut pilersorsinnaanitta suli ineriartorteqqinneqarsinnaanera pilersuisut, tassalu ilissi, sapernagu peqataaffigerusukkissi aamma ineriartortitseqataaffigerusukkissi.

Ukiuni aggersuni aalisarnerup aaqqissuuteqqinneqarnera Naalakkersuisuni pimoorullugu suliarissallutigu Naalakkersuisooqatigiinnermi isumaqatigiissutitsinni ersarissarparput. Pisariaqarluinnarpormi pingaartumik sinerissap qanittuani aalisariutit eqqarsaatigalugit maannamut inatsisitigut periarfissaareersut atorluarnerisigut aammalu pissutsit aaqqissuuteqqinnerisigut suliaqassalluta.

Ilisimavarput aningaasatigut ingerlatsineq amerlasuunut patajaatsuunngitsoq taamatullu ineriartoqqissinnaanermut killiliisuusinnaasoq. Pissutsit imminnut ataqatigiissunngortillugit suliniuteqarusuppugut, tassalu aalisartoq piniartorlu imminut pilersortuartuusoq aamma aningaasatigut iluanaaruteqarsinnaanera annertusartariaqarmat taassumalu siunissani patajaatsumik nammineerluni aaqqissuusseqataaffigisinnaaniassallugu akisussaaqataammat. Naalakkersuisuni aalisartumut piniartumullu siunissaq takorluugarput tassaavoq, patajaatsumik iluanaarfiusumik isertitaqarneq, ileqqaaruteqarsinnaanermik kingunilik taamatullu ineriartortuarsinnaanermik aaqqissuussaasumik nammineerluni ingerlatsisinnaaneq.

Tassani pisortanit tapiinerit pingaarnerunngikkaluarlutik ilapertuutitut atorneqarsinnaaneri eqqarsaataallutik.

Suliniutit ataatsimoorullugit ingerlakkutsigit akisussaaqatigiilluta nammaqatigiillutalu angusaqarluarumaarpugut, ilaatigut aalisarnerup uneqattaartuunngitsumik ingerlanneqarnissaanik suliniuteqarnitsigut. Aalisagartassatut piniagassatigullu pisassiissutigineqartut qanoq aaqqissuunneqarsinnaanerisigut apeqqutit naliliiffigalugillu nalimmassaaniarpugut nungukkiartuutaanngitsumik siunertalimmik.

Sumiiffinni piffikkaartuni tunisassiorfiit kisiisa nappataatillugit pimoorussisumik patajaatsumik ingerlatsisoqassaaq, tassanilu inuiaqatigiit pigisaat suliffeqarfissuaq Royal Greenland A/S avaqqukkuminaatsuuvoq suleqatigissallugu. RG isumaqatiginiarneqarpoq tunitsivinnik akisussaaqataanermut peqataanissamut suleqataaqqullugu, aningaasaliinertaqanngitsumillu siunissami namminerisaminnik ingerlatsinissaat qulakkeerneqartariaqarmat.

Inuiaqatigiittut nammassinnnaanngilarput AGF-itut ittut aqqusaaqqissallugit.

Naalakkersuisut Siulittaasuattut qilanaaqaanga suliassanut pissanganartorpassuarnut. Qularissanngilarsi peqataatinneqarnissassinnik. Naalakkersuisooqatigiit suleqatigiissutissaminni isumaqatigiissutaat qulequtserparput Nuna ataasiusoq, inuiaat ataatsimoortut, tamannalu Naalakkersuisut Siulittaasuattut qulakkeerumallugu nalliuttorsiornissinni pilluaqqussutinnut atatillugu tulluartuutippara taassallugu.

Naggataatigut minnerunngitsumillu ukiorpaalunngortuni siulittaasorisimasarsi Leif Fontain qinigassanngorteqqinniarani aalangersimasoq manna aqqutigalugu Naalakkersuisut sinnerlugit qujassummik apuussiffigerusuppara. Piniarnernikkut aalisarnikkullu pissutsit eqqarsaatigalugit ukiuni assoralisimaarfiusuni siuttuusimavoq pingaarutilinnillu angusaqarfiusumik kattuffissi sinnerlugu suleqataasarsimalluni. Leif Fontain tamanik ajunngitsunik angusaqarfiulluartumillu siunissamik kissaappara.

Kattuffup nalliuttorsiorluarnissaannik kissaappassittaaq.

Qujanaq