Nunaqarfiit pillugit

Naalakkersuisut nunaqarfiit suleqatigineri siunissaallu nukittorsarniarpaat

Naalakkersuisut Siulittaasuata Aleqa Hammondip aammalu Naalakkersuisunut Ilaasortap Vittus Qujaukitsup KANUNUPE ullumi nuannersumik ataatsimeeqatigaa.

Ataatsimiinnermi siunniunneqarpoq nunaqarfinni suleqatigiinnerit nukittorsarneqassasut tamannalu akulikinnerusunik ataatsimiittarnernik kinguneqassasoq.

Pilersaarutigineqareersimalerpoq ukiamut nunaqarfiit najugaqarfiillu isorliunerusut ineriartortinneqarnissaat pillugu isumasioqatigiittoqassasoq.

Ilanngullugulu isumaqatigiissutigineqarpoq inuiaqatigiit akuutillugit oqaloqatigiinnerit Naalakkersuisut, kommunit, KANUNUPE aammalu KANUKOKA suleqatigalugit ingerlanneqartassasut.