Start Up Greenland

Start Up Greenlandimut peqataallutit isumassarsiat piviusunngortiguk

Qaqortumi Niuernermik Ilinniarfimmi Start Up Greenland junip 7-anni ualikkut 17.00-miit ingerlanneqalerpoq. Suliffeqarfissamut isumassarsiallit imaluunniit aallarnisaarusuttut akunnerit 54it ingerlaneranni inerisaatinneqassapput. Peqataasunullu tamanut nerisaqartitsisoqassaaq.

Inuussutissarsiutinut Aatsitassanut Suliffeqarnermullu Naalakkersuisoqarfik aamma Greenland Business Start Up Greenlandimik aaqqissuisuupput. Start Up Greenland iluatsitsiffiulluartumik Nuummi Sisimiunilu ingerlanneqareerpoq. Qaqortumilu suliffeqarfissanut isumassarsiaqartut imaluunniit aallarnisaarusuttut Start Up Greenlandimut peqataanissaminnut tikilluaqqusaapput. Start Up Greenlandimi pilersitsisarnermik inerisaanermillu misilittagaqartut aamma Greenland Businessimit inuussutissarsiutinut siunnersortit ikiortigalugit isumassarsiat piviusunngortinniarneqassapput.

”Inuit isumassarsiullaqqissuunerat takullugu nuanneqaaq. Ilimagilluinnarparalu nunatsinni amerlasuut atorluarneqarsinnaasunik isumassarsiaateqartut, taakkulu sammivilimmik ikiorneqarpata isumassarsiaat suliffeqarfinngortinneqarsinnaapput imminut akilersinnaasut, Inuussutissarsiornermut Aatsitassanullu Naalakkersuisoq Jens-Erik Kirkegaard oqarpoq.

Naliliisartut

Start Up Greenland iluatitsilluarfiusumik Nuummi Sisimiunilu ingerlanneqareerpoq.

-Peqataalluartoqarnera tulluusimaarnaqaaq inuussutissarsiutinillu ingerlatsisut kajumissaarilluaqaat. Inerisaatitsineq ataatsimooqatigiinnermik pilersitsivoq peqataasullu nukissaqarluarput, inerisaatitsinermut siunnersorti Lars Møller Kranker Sisimiuni Start Up Greenlandip 20it sinnerlugit peqataaffigineqartup naammassereernerani oqarpoq.

Sisimiuni Start Up Greenlandimi naliliisartuutinneqarput KNI A/S-imi Pisortaaneq Claus Jensen, Pisortaaneq Per Steen Pisiffik, Pisiniarfiutilik Anita Høegh Qiviut aamma 4A Revisionimit Vinni Pietras-Jensen. Naliliisartullu Ole Møllerip Multifabrikimik isumassarsiaa pitsanerpaatut toqqarpaat.

-Start Up Greenland iluaqutigeqaara, isumassarsiara pillugu inuit akornanni saqqummiisinnaaneq periarfissiissutigineqarmat iluaqutigeqaara, Ole Møller 33-nik ukiulik oqarpoq. Multifabrikimi atoqqiilluni assigiinngitsunik tunisassiortoqartassaaq, soorlu assakaasunit qaartitserinermi assiaqutissat sananeqartassapput. Aalisakkanik tunisassiornermi sinnikut aamma qisukut akugalugit naggorissaasiortoqartassalluni aamma aluminiumimik umiatsialiassat katiterneqartassallutik. Tunisassiallu taakku tamarmik nunanit allaniit nioqqutissanik eqqussuinermik annikillisaaqataassapput.

-Suliffeqarfinni eqqarsartariaaseq allanngortittariaqarparput, ukioq kaajallallugu suliassaqarniaraanni ataasiinnarmik suliaqarneq qimallugu assigiinngitsunik suliassanik tunisassiortariaqarpugut, Ole Møller oqarpoq. Sisimiuni Start Up Greenlandip ingerlanneqarnerani Ole Møller isumassarsiaminik ineriartortitsinissaminut periarfissinneqarpoq, Multifabrikkillu piviusunngorsinnaanera nalilersortillugu.

Start Up Greenland tullii

Sisimiuni naliliisartut misiliummik pilersaarusianik sisamanik takusaqarput
-Ole Møllerip suliffeqarfissatut isumassarsiaa Kalaallit Nunaanni inuiaqatigiinnut tapertaalluarsinnaanerpaasutut nalilerparput, niuernermilu ingerlatsinermi iluanaaruteqarfiusinnaasutut periarfissaqarluni, KNI A/Simi pisortaaneq Claus Jensen oqarpoq, Sisimiunilu aallarnisaarusuttut isumassarsiaat saqqummiunneqartut soqutiginaateqarnerarpai.

Pilersaarutaavoq Ilulissani aamma Aasianni Start Up Greenland ukiariartornerani ingerlanneqassasoq, taakkunanilu ajugaasut Nuummi sapaatip akunnerisa 47-anni naapisinneqassapput.

Paasissutissat allat pissarsiarisinnaavatit uani:
www.facebook.com/StartUpGreenland<http://www.facebook.com/StartUpGreenland

Annerusumillu paasisaqarusukkuit uku attaveqarfigisinnaavatit:
Sara Heilmann,Greenland Businessimi Inuussutissarsiutinut siunnersorti +299 58 84 04
Lars Møller Kranker, Start Up Greenlandimi aallarnisaarusuttunut siunnersorti +299 23 74 00
Ole Møller, Sisimiuni Start Up Greenlandimi pitsaanerpaamik isumassarsialik +299 27 17 00