Nick Nielsen: Sanaartugassat maanna aallartinneqassapput

Ilulissani Narsamilu atuarfiit matuneqarnerisa kingorna maanna qanoq iliuuseqartoqarnissaa qulakkeerniassallugu Ilinniartitaanermut, Ilageeqarnermut, Kultureqarnermut Naligiissitaanermullu Naalakkersuisoq Nick Nielsen Ilulissanukarpoq. Borgmesterit Ole Dorph aamma Jørgen Wæver Johansen unnugu ataatsimeeqatigineqassapput.

”Suliassat aallartinneqartariaqarput, meerartattami meeqqat atuarfiinut initagissaartunut piaarnerpaamik utersinnaanissaat pisussaaffigaarput.”, Nick Nielsen oqarpoq. ”Taamaammat Olep Joorullu Ilulissani ullut makku ataatsimiillutik ulapikkaluaqalutik, Ilulissani sanaartugassap Narsamilu nutarterinissamik pilersaarutip aallartinneqarnissaannut aporfiusimasut paaseqatigiiffiusumik isumannaarneqarnissaat siunertaralugu unnummut ataatsimeeqataanissamut akuersisimanerat nuannaarutigaara”.

”Aaqqiissutissanik isumaqatigiissuteqarnissarput qularinngilara, aammali sanaartornissap nutarterinissallu sivisunissaat nassuerutigisariaqarparput – taamaakkaluartorli sanaartorfinni suliat naammassiartuaarnerat ullut ingerlaneranni malinnaaffigineqarsinnaassaaq.” Nick naggasiivoq.