Atuarfiliornissaq nutarterinissarlu

Atuarfiliornissaq atuarfimmillu nutarterinissaq maanna aallartinneqalerput

Ilulissani Narsamilu meeqqat atuarfiisa illutaat pillugit ataatsimiinnerit marluk Naalakkersuisup Nick Nielsenip Ilulissani sisamanngormat unnukkut peqataaffigai.

Unnuk aallarnerlugu Qaasuitsup Kommuniata borgmesteria Ole Dorph borgmesterillu tullia Jess Svane ataatsimeeqatigineqarput, Atuarfik Mathias Storchip oqoqartup maannalu matuneqartup taartissaanik nutaamik atuarfiliornissamik pilersaarutit tuaviuunneqarnissaannik qulakkeerinissaq tassani eqqartorneqarluni.

Borgmester Ole Dorphip ataatsimiinnermi nalunaarutigaa atuarfissap nutaap, maanna atuarfiusup Atuarfik Mathias Storchip inissisimaffiani sananeqarnissaa kommunalbestyrelsip aalajangersimagaa. Tassa imaappoq isaterneqarnissaata suliariumannittussarsiuunneqarnissaa piffissami qaninnermi pisinnaalerpoq, atuarfissallu sanaartorneqarnissaata pilersaarusiorneqarnissaa suliariumannittussarsiuunneqarnissaanullu atortussat maanna aallartinneqalerlutik. Sapaatip akunnerata aallartilaarnerani tusagassiuutitigut nalunaarutigineqartutuut, ukiuni atuarfiliassap sanaartorneqarfissaani ininik atuartitsiviusinnaasunik aaqqiissuteqarnissaq kommunip maanna misississorpaa.

Borgmester Ole Dorph oqarpoq: "Kommunitta atuarfiliorneq pillugu Namminersorlutik Oqartussanut qanimut aammalu pitsaasumik angusaqarfiulluartumillu, aammattaaq siunissamut isigisumik attaveqarnissaa pingaartuuvoq. Pilersaarutip maanna aporfeqaqattaarani ingerlanneqarnissaa meerartatsinnut qulakkiigassaraarput ".

Unnuup ingerlanerani borgmester Jørgen Wæver Johansen kommunalbestyrelsemilu ilaasortat Ole Mølgaard-Motzfeldt, Simon Simonsen aamma Kelly Berthelsen ataatsimeeqatigineqarput, tassani eqqartorneqarlutik Narsami atuarfiup, sapaatip akunnerani uanissaaq matuneqartup nutarterneqarnissaanik pilersaarutit.

Ataatsimiinneq taanna aamma pitsaasumik angusaqarfiulluartumillu aammalu aaqqiissuteqarnissamik anguniagaqarfiusumik ingerlanneqarpoq, aaqqiissutissatullu isumaqatigiissutigineqartoq Narsami atuartut atuarfimmik pitsaasumik siunissamilu atorluarsinnaasumik peqalernissaannik qulakkeerussisussaavoq. Aaqqiissutissatut isumaqatigiissutaasoq Naalakkersuisunit aammalu Inatsisartut Aningaasaqarnermut Ataatsimiititaliaannit akuerineqaqqaartussaavoq, akuerineqariarpallu nutarterinissamik pilersaarusiornissaq erngerluni aallartinneqarsinnaassaaq.

Borgmester Jørgen Wæver Johansen oqarpoq: "Meerartatta aasami atuanngiffeqareerlutik atualeqqissinnaanissaat qulakkeerniarlugu aaqqiissutissamik atorluarsinnaasumik aasap ingerlanerani nassaarniarnissarput kommunimi qilanaaraarput, kisianni Narsap Atuarfiani ajornartorsiutigisimasatta atorluarsinnaasumik siunissamullu qulakkeerisumik maanna aaqqiiviginiarneqalernerat toqqissiallannartoq nuannaarutigisorujussuuara."