Arferit pillugit

Kunngeqarfiup Arfanniarneq Pillugu Ataatsimiititaliarsuarmut ilaasortaanera

Aalisarnermut, Piniarnermut Nunalerinermullu Naalakkersuisoq, Karl Lyberth:

Kalaallit Nunaata kissaatigaa, Arfanniarneq Pillugu Ataatsimiititaliarsuaq (IWC) maleruaqqusamigut siunertarineqartut naapertorlugit ingerlassasoq, ullumikkulli killiffigilersimasamisut eqqissisimasimatitsiniaqatigiiffittut pinnani.

- Kalaallit Nunaanni arfanniarneq Kunngeqarfiullu IWC pillugu ataatsimut attuumassuteqarnera pillugit, Kalaallit Nunaat, Savalimmiut Danmarkillu akornanni sukumiisumik oqallittoqarnissaa sivisuumik pisariaqartinneqarsimavoq. 2012-imili oqallinneq tamanna Kalaallit Nunaata tungaanit ujartorneqarsimavoq.  Tamaattumik danskit, savalimmiormiut kalaallillu politikeriisa akornini, Kunngeqarfiup arfanniarneq pillugu isumaa pillugu isumasioqatigiittoqarnissaa, isummanik anitsivissatut qujarunnassasoq, Kunngeqarfiullu arfanniarneq pillugu aamma IWC-imut Kunngeqarfiup attuumassuteqarnera qanoq inissisimanissaanik tikkuussisinnaasoq pingaarutilik.

- Ilisimatuussutsikkut ilisimasanik nungusaataanngitsumillu ingerlatsinermik taamaallaat aallaaveqartumik pisassiissutinik aqutsineq Kalaallit Nunaata siunertaraa.

- 2013-imit pisassiissutinik qaffaanissamik Kalaallit Nunaata kissaataa, IWC-ip ilisimatuussutsikkut ataatsimiitialiaanik, ataatsimiititaliap ukiumoortumik julimi siorna ataatsimiinnerani taperserneqarpoq.  Ataatsimiititaliarsuarmili taasinermi Kalaallit Nunaata pisassiissutissanik siunnersuutaa, naammattumik politikkikkut tapersersorneqanngilaq.

- Nunap inoqqaavisut Kalaallit Nunaanni neqissaqarniarneq naammassiniarlugu, IWC-imilli ilisimatuussutsikkut siunnersuutit ataqqillugit, Kalaallit Nunaanni arfanniarnerup ingerlaannarallarnissaanik IWC-imut nalunaaruteqarnissat Kalaallit Nunaata piareerfigisimavaa.

- IWC-imit aalajangiinerit ilisimatuussutsikkullu siunnersuinerit ataqqiniarlugit, Naalakkersuisut ataavartumik piniarneq malittarissavaat nalilersorlugulu.

- Siunissaq eqqarsaatigalugu pisassiivimmi 2014-2018-imut, IWC-ip 2014-imi tulliani ataatsimiinnissaani aaqqiissuteqarnissaq, Kalaallit Nunaata siunertariuarsimavaa.

- Naluneqanngitsutut, arfernik angisuunik ilisimatuussutsikkut nammineerluni inasssuteqaamminik, IWC-ip malinnissimannginnera naammagisimaanngilarput.

- Tamannali pillugu Kalaallit Nunaata kissaatiginngilaa siunertarinagulu Kunngeqarfiup IWC-imit aninissaa.

- Arfanniarnermik aqutsinermi IWC-ip attatiinnarneqarnissaa Kalaallit Nunaata kissaatigaa, nungusaataanngitsumilli aallaaveqarluni ingerlassasoq suliniaqatigiiffiullu tamatumunnga ilumini nukittorsarneqassasoq.

- Kunngeqarfimmi naalagaaffeqatigiinni Kalaallit Nunaat kisiartaalluni arfernik angisuunik piniarnermik ingerlataqarpoq. Taamaammat Danmark, Naalagaaffeqatigiinneq sinnerlugu, Kalaallit Nunaat Savalimmiullu tusarniaqqaarnagit, aalajangiisinnaanngilaq.

- Namminersorneq Pillugu Inatsit naapertorlugu, Kunngeqarfiup ilaasortaanermik, ilaasortaanerulluunniit ilaanik atorunnaarsitsinera, Inatsisartunut saqqummiunneqartussaavoq.