Aalisagartornerugit

Nunatsinni Nerisaqarnermut Timigissarnermullu Siunnersuisoqatigiit nerisassat peqqinnissamut pingaaruteqarneri pillugit ilisimasanut nutaanut ingerlaavartumik malinnaapput nerisaqarnermut innersuussutigut ilisimanik nutaanerpaanik tunngaveqarnissaq qulakkeerniarlugu.
Aviisimut ilanngutassiami Ålborg Universitetip napparsimmavissuaneersumi tusagassiuutinut saqqummersumi qulequttat ”aalisakkat uummammut peqqinnartuunerannik qulartitsilernermut” pissutaasoq Nerisaqarnermut Timigissarnermullu Siuunersuisoqatigiit nalilerpaat.

Tusagassiorfinnut nalunaarummut isersinnaavutit (link).

ILISIMATUUSSUTSIKKUT UPPERNARSAATISSAQANNGITSOQ
Isumaqanngilagut ilisimatuussutsikkut allaaserisaq taamatut inerniliisoq. Allaaserisaq nammineq inerniliivoq aseruuttoornermut eqqaanartuniit bakteeriaqanngitsuniit aaversinnerit marluk kalaaliminertorluni nerinermi allanngorartuusut. Inernernut pissutaasut allaatigisami oqaatigineqanngillat.
Allaatigisaq nammineq ileqquusumik kalaalimernit arfineq marluk inuussutissatigut imaqarnermikkut annertuumik assigiinngitsut uuttuiffigai: umimmak, tuttu, ukaleq, aalisakkat, puisi, arfeq aamma timmissat piginiagassat aamma nerisassanik eqqunneqartartunik arfineq marlunnnik assersuullugit: nerisassiat ineriikkat, naatsiiat, naatitat, paarmat nutaat,punneq, manniit aamma immussuaq.

Taamaalilluni aalisagaq kisimi uuttuiffigineqanngilaq aamma aalisagaq allaaserisami ataasiaannarluniluunniit eqqaaneqarnani.

Allaaserisap allaqqaarneqarneranut isersinnaavutit (link).

Allaaserisami taamaattumik aalisakkap peqqinnartuuneranik apeqqusiinissamut ilisimatuussutsikkut uppernarsaateqanngilaq. Nerisaqarnermut Timigissarnermullu Siunnersuisoqatigiit Ålborg Universitetip napparsimmavissuani ilisimatusarneq annertuumik soqutiginnillutik suli malinnaaffigaat aamma siunissami nunatsinni inunnut inassuteqaatinut attuumassuteqarsinnaasunik ilisimasanik nutaanik arajutsinaveersassalluni.

AALISAGARTORNERUGIT
Tusagassiorfinnut nalunaarut kalaallit ileqquussumik nerisaat aalisagarpassuarnik akoqartarnera pillugu ilisimatuut arlaannit ataatsimit oqaaseqarnermik tunngaveqarpoq. Ajoraluartumilli eqqunngilaq kalaallit ullumikkut annertuumik aalisagartortartut. Innuttaasut ilaat annertuumik aalisagartorput, kisianni innuttaasut amerlanerit, sapaatip akunneranut marloriarlutik aalisagartornissaannut innersuussinermut malinninngillat, tamannalu uggornarpoq, nunarsuarmi aalisakkanik pitsaanerpaanik ajornanngitsumik pissarsisinnaagatta.
Nerisaqarnermut Timigissarnermullu Siunnersuisoqatigiit sullissiviit, niuertarfiit, aalisakkeriviit il.il. akornanni peqatigiinneq nukittorsarniarlugu annikinnerusumik aaqqissuussamik ataatsimiisitseqqammerpoq kalaallit inuit annertunerusumik aalisagartortilernissaat siunertaralugu.

NERISASSAQ SUNA PEQQINNARTUUNERSOQ NALORNISSUTIGIVIUK? NERISAQARNERMUT INNERSUUSSUTIT QULIT MALIKKIT
Nerisaqarnermut Timigissarnermullu Siunnersuisoqatigiit ”Nerisaqarnermut innersuussutit qulit” suliarisimavaat, kalaallinut atatillugu nerisassat peqqinnartut aalanerlu pillugit inassuteqaataasut. Nerisassat peqqinnartut tassaapput nerisassat, nukinnik, inuussutissanik, vitamininik mineralinillu naammattunik akoqartut. Nunatsinni pisarnertut nerisagut proteineqarluartuupput, sukkoqarpiaratik aamma vitamininik mineralinnillu pingaarutilinnik akoqarlutik.

Nerisaqarnermut innersuussutit qulit uani atuarsinnaavatit:

http://peqqik.gl/Sundhed/Kost_og_motion/De%2010%20kostr%C3%A5d.aspx?sc_lang=gl

Nerisaqarnermut Timigissarnermullu Siunnersuisoqatigiit inassutigaat, nerisat peqqinnartut pingaarutillit ilaattut, akulikitsumik aalisagartortassasugut.

Annertunerusumik paasisaqarusukkut attavigissavat Nerisaqarnermut Timigissarnermullu Siunnersuisoqatigiit siulittaasuat Gert Mulvad oqarasuaat +299 34 44 81 imaluunniit e-mail gm@peqqik.gl

Nerisaqarnermut Timigissarnermullu Siunnersuisoqatigiit nerisat, timigissarnerup peqqissuunerullu akornanni ataqatigiinnerit pillugit Peqqissutsimut Attaveqarnermullu Naalakkersuisumut siunnersuisarput.

Siunnersuisoqatigiit ilaatigut suliassaraat:
• Nerisaqarnerup timigissarnerullu aamma peqqissutsip/napparsimanerup akornanni ataqatigiittoqarnera pillugu uppernarsaatinik saqqummiinissaq kiisalu taakkununnga kaammattuutaasinnaasunik ingerlatitseqqiisarnissaq,
• Nerisaqarnermut timigissarnermullu ataatsimoortumik suliniutinut anguniakkanut pilersaarutinullu siunnersuuteqarnissaq,
• Nerisaqarnerup timigissarnerullu pingaaruteqarnerat pillugu innuttaasunut paasissutissiinermut siunnersuinermullu peqataanissaq,
• Nunat allat suliffeqarfiutaannut attuumassutilinnut suleqatiginninnissaq suleqatigiinnullu peqataanissaq,
• Kalaallit inuussutissaatai aamma timi atorlugu sammisaqarnerit pillugit peqqissutsikkut, kulturikkut aningaasatigullu assigiinngissutsit pillugit ilisimatusaatigineqarsinnaasutut pisariaqartinneqartut tikkuassallugit.