True North Gems pillugu

True North Gemsip rubinimik suliniutaa Aappaluttoq tamanut ammasumik tusarniaassutigineqalerpoq

True North Gemsip Qeqertarsuatsiaat eqqaanni Rubinimik suliniutini Aappaluttoq pillugu aatsitassarsiornermut akuersissummik qinnuteqaateqarpoq. Naalakkersusiut junip 6-ani ataatsimiinnerminni aalajangerput Inuiaqatigiinnut Piujuartitsilluni Iluaqutissanik Naliliineq (VSB) aamma Avatangiisinut Sunniutaasussanik Nalilersuineq (VVM) tamanut ammasumik tusarniaassutigineqassasut.

Inuussutissarsiutinut Aatsitassanullu Naalakkersuisoq Jens-Erik Kirkegaard:
- Nuummi aamma Qeqertarsuatsiaani tamanut ammasumik ataatsimiisitsinissanut aamma soqutigisaqatigiit tusarnissaanut erinisuppunga, neriuutigaaralu ataatsimiisitsinerit peqataaffigineqarluarumaartut.  

Tusarniaalluni ataatsimiisitsinissat ullussai tusagassiuutitigut nalunaarutigineqartassapput. Aatsitassarsiornermi suliniutini inuiaqatigiit peqataatinneqartarnissaannut iliuuseqarnermi, tamanut ammasumik tusarniaalluni ataatsimiisitsinerni kiffaanngissuseqartumik aqutsisoqartartussaavoq. Tamanut ammasumik tusarniaanerni kiffaanngissuseqarluni aqutsisussamik tamanut ammasumik neqerooruteqartoqassaaq. Kiffaanngissuseqartumillu aqutsisussap toqqarneqareernerani tamanut ammasumik tusarniaalluni ataatsimiisitsinissat ullussai saqqummiunneqarumaarput.

True North Gemsip Grontmij A/S aamma Rambøll Qeqertarsuatsiaat eqqaani rubinimik suliniummi Inuiaqatigiinnut Piujuartitsilluni Iluaqutissanik Nalilersuinermik (VSB)aamma Avatangiisinut Sunniutaasussanik Nalilersuinermik (VVM) suliaqartippai, nalilersuinerillu taakku tamanut ammasumik tusarniaassutigineqassapput. Naalakkersuisut.gl-imilu quppersakkami ”tusarniaanerit” takuneqarsinnaassapput.

Tamanut ammasumik tusarniaaneq aasaanerani sulinngiffeqarnerup nalerimmagu sapaatip akunnerinit arfineq pingasunit sivisunerusumik ingerlanneqassaaq 2013-imilu septemberip aallartinnerani naammassineqassalluni. 

Annerusumik paasisaqarusukkuit attavigiuk: Naalakkersuisup allattaa Kirsten Enequist, mobil 299 58 37 54