Aneerasaartarfiit isumannaallisaaviginissaat aallunneqarpoq

Tallimanngornermi 31. maj 2013 naalungiarsuk ataatsimik ukiulik Tuapannguani napasuliat ilaanni init quleriit arfernanniit nakkarpoq. Naalakkersuisunut ilaasortaq Miiti Lynge oqarpoq:

”Meeqqat mikisut aneerasaartarfimmiinnerminni ulorianartorsiorsinnaasut illuummik piginnittoq (Illuut A/S) aamma entreprenøri (Permagreen) attartortunut nalunaaruteqarsimasut ilisimatinneqarpunga. Illuut A/S-ip entreprenørillu aneerasaartarfiit sorpiaat akunnerini isumannaallisaanermut ungasissusissamik malinniffiunnginnersut misissorlugu maannakkut ingerlappaat. Tamatuma kingorna aamma aneerasaartarfiit isumannaallisarniarlugit aaqqiissutissanik atuukkallartussanik ataavartussanillu piaarnerpaamik suliaqartoqassaaq.”

Kiisalu Naalakkersuisunut ilaasortaq Miiti Lynge imatut oqarpoq:

”Suliap piaarnerpaamik malitseqartinneqarnissaa pingaaruteqartorujussuuvoq, taamaattumillu Illuut A/S-ip ilisimatippaanga, ajornartorsiummut teknikkikkut aaqqiissutissamik atorsinnaasumik nassaarniarnissaq pingaartinneqartorujussuuvoq.”

Naggataatigut Naalakkersuisunut ilaasortaq Miiti Lynge oqarpoq, ”Suliami paasissutissat tusagassiuutitigut malinnaaffigaakka, eqqarsaativullu nukiappiarannguamut ilaqutaanullu sammitippavut, peqqissinissaa neriuutigalugu.”

Annertunerusumik paasisaqarusunnermi attaveqarfigineqarsinnaavoq Ineqarnermut, Pinngortitamut Avatangiisinullu Naalakkersuisoq Miiti Lynge, oqarasuaat 34 64 58 imaluunniit mail: lkso@nanoq.gl