Naalakkersuisut Siulittaasuata Island tikeraarpaa

Islandip Prøsidentianik Ólafur Ragnar Grimsson-mik Statsministerertaamillu Sigmundur Davíð Gunnlaugsson-mik Naalakkersuisut Siulittaasuata Aleqa Hammondip ataatsimeeqateqarnerani Islandimik suleqateqarnerunissaq isumaqatigiissutigineqarpoq.

Aleqa Hammond og Praesident Olafur Ragnar Grimsson

Tallimanngorneq 7. juni 2013 Reykjavikimi Aleqa Hamondip Islandip Præsidentia Ólafur Ragnar Grimsson Statsministerertaarlu Sigmundur Davíð Gunnlaugsson ataatsimeeqatigai. Præsident Grimssonimik ataatsimeeqateqarneq pivoq Reykjavikip silatinnguani Præsidentip pisortatigoortumik angerlarsimaffiani Bessastadir-imi.

Ataatsimiinnermi Aleqa hammondip Sigmundur Davíð Gunnlaugsson Naalakkersuisooqatigiinnik pilersitsinerani pilluaqquaa, isumaqatigiissutigalugulu Kalaallit Nunaata Islandillu ukiuni aggersuni suleqatigiinnerup annertusarneqarnissaa. Pingaartumik peqqinnissaqarnikkut, angallassinikkut, nunap ataqatigiinneranut attaveqarfiinut kiisalu aatsitassarsiornerup tungaasigut qanimut suleqatigiissutigineqarsinnaasutigut periarfissaqartuni suleqatigiinnerunissaq pineqarluni.

Kalaallit Nunaata Issittumi Siunnersuisoqatigiinni inissisimanera, taamatuttaaq Kalaallit Nunaata EU-mut tunngatillugu inissisimanera eqqartorneqarlutik. Issittumut nunarsuarmioqatigiit soqutiginnileraluttuinnarnerat pillugu Kalaallit Nunaata Islandillu nunani issittuni taamatullu nunarsuarmioqatigiit sinnerinut ataatsimoornissaat isumaqatigiissutigineqaroq.

Aleqa Hammond-ip periarfissaq iluatsillugu Islandip Præsidentia Statsministerialu ukiamut nunatsinnut tikeraarsarpai, tamannalu islandimiut Nuummi aallartitaqarfissaata ammarneqarnerani nalerorneqarsinnaalluni. Islandip aallartitaqarfissaa Kalaallit Nunaanni sorsunnersuup kingulliup kingornatigut nunatta nunanut allanut attaveqarnerani aallartitaqarfiit siullersarissavaat.

 

Annertunerusumik paasisaqarusukkuit tusagassiinermi siunnersortaagallartumut Julie Rademacher-imut attaveqarsinnaavusi oqarasuaat +299 548878