Kalaallit Nunaanni eqqagassat

Kalaallit Nunaanni eqqagassat pillugit atuartitsinermut najoqqutassat nutaat atuarfinnut tamanut nassiussorneqalerput

Atuartitsinermut najoqqutassat ”Eqqagassat – isumassarsiat isumassarsiorfissallu” saqqummersinneqaqqammersunut Naalakkersuisut saqqummersitsisuupput. Quppersagaq eqqagassanut eqqagassallu ajornartorsiutaanerannut atuartitsissutissatut siunnersuutinik arlalinnik imaqarpoq.

Atuartitsinermut najoqqutassani atuartut najukkami, nunami namminermi nunarsuarmilu eqqagassat pillugit unammilligassanut paasitinneqarnissaasa qulakkeerneqarnissaa siunertarineqarpoq. Atuagaq ”Eqqagassat – isumassarsiat isumassarsiorfissallu” Kalaallit Nunaanni atuarfinnut tamanut siaruarterneqassaaq, meeqqallu atuarfiini ilinniartitsisut atuartitsineranni quppersakkatut atorneqassalluni. Atuakkap imai agguagaapput, taamaalillunilu ukioqatigiiaani tamaginni atorneqarsinnaassalluni.

Nuummi Atuarfik Hans Lynge-mi 4. klassit siullersaallutik atuagaq ullumi misilippaat. Klasselæreri Anne Elmark:
- Atuartut suliassanut soqutiginnittorujussuupput, suliassartaalu piumassuseqarluarlutik suliaraat. Eqqagassanut tunngasut maannakkut sammissagivut qularnanngilluinnarpoq.

Tamatta akisussaaqataasariaqarpugut
Eqqagassat pillugit Kalaallit Nunaanni meeqqat atuarfiini ilinniartitsissutitut ineriartortinneqarnissaat Naalakkersuisunut pingaaruteqarsimavoq.
Ineqarnermut, Pinngortitamut Avatangiisinullu Naalakkersuisoq, Miiti Lynge:
- Naalakkersuisunut ilaasortatut sulininni pinngortitamut avatangiisinullu susassaqarfiup piujuartitsisussamik ineriartortinneqarnissaata tamatigut qulakkeernissaa anguniagaraara. Atuartitsisunut quppersagaq una siunissami kinguaariit tulliuttut Kalaallit Nunaanni eqqagassalerinerup piujuartitsisussamik suliarinissaanut peqataasinnaalernissaannut sunniuteqarsinnaalernissaannullu sakkussaavoq pitsaasoq.

Inuiaqatigiit nutaaliaasut nassatarisaat
Inuiaqatigiinni atuisut kalaallit nutaaliaasut ineriartornerisa nassatarisaanik eqqakkat amerliartorput, aammalu eqqakkat avatangiisinut ulorianartumik sunniuteqartartut amerliartorlutik. Eqqakkat ulorianaatillit tassaapput qulliit peerii sipaarnartut, qalipaatit batteriillu.

Naalakkersuisoq Miiti Lynge:
- Akuutissat taamaattut avatangiisinut peqqissutsimullu ulorianaateqarput, taamaattumillu atuinerput tassungalu atatillugu eqqagassanik ajornartorsiuteqarnerput pillugu ilinniarnissaq meeqqat atuarfiini aallartinneqareernissaa uatsinnut pingaaruteqarpoq.

Ilinniartitsisunut quppersagaq ”Eqqagassat – isumassarsiat isumassarsiorfissallu” Kalaallit Nunaanni pissutsinut naleqqussarneqaannarsimanngilaq, kisiannili Kalaallit Nunaanni meeqqat atuarfippiaannut naleqqussarneqarluni ineriartortinneqarsimavoq.

Det Europæiske Miljøagentur aamma Inerisaavik atuartitsinermut najoqqutassat piviusunngornissaanut suleqataapput.

Annertunerusumik paasisaqarusunnermi attaveqarfigineqarsinnaavoq Ineqarnermut, Pinngortitamut Avatangiisinullu Naalakkersuisoq Miiti Lynge, oqarasuaat 34 64 58 imaluunniit mail: lkso@nanoq.gl