Atorunnaarsitsigallarneq

Aqutsiveqarfimmi Upernavimmi umiatsiaararsortunut qaammatinut pingasukkaartumik pisassiisarnerup atorunnaarsikkallarneqarnera

Naalakkersuisut 31. maj 2013-imi ataatsimiinnerminni ima aalajangerput:

Sinerissamut qanittumut umiatsiaararsortunut qaammatinut pingasunut qaleralittassiisarnerup aqutsiveqarfimmi Upernavimmi atorunnaarsikkallarneqarnissaa. Taamaalilluni aqutsiveqarfimmi Upernavimmi umiatsiaararsorluni qaleralinniarneq ingerlaannarsinnaanngorpoq ukiumut pisassiissutinut qaffaanissamik aalajangiisoqarsinnaanerata tungaanut.

Qulaani aalajangiineq tunngaveqarpoq KANUAANA ulloq 29. maj 2013 nalunaaruteqarmat pisassiissutit qaammatinut pingasunut 879 tonsiusut aqutsiveqarfimmi Upernavimmi tamarmik aalisarneqarsimalermata.

Aalisarnermut Siunnersuisoqatigiit ilaasortaannik tassungalu attuumassutilinnik inuttalimmik suleqatigiissitaliortoqarpoq. Suleqatigiissitap misissugassaasa ilagaat sinerissap qanittuani 2013-imut qaleralittassiissutit amerlineqarnissaannik periarfissat. Suleqatigiissitap inassuteqaatini tunniutereerpagit Naalakkersuisunit isummerfigineqarumaarput.

Inussiarnersumik inuulluaqqusillunga


Karl Lyberth
Naalakkersuisoq