Meeqqanik oqaloqateqarnermi atugassiat

Atuakkat meeqqanik oqaloqateqarnermi atugassiat marluk nutaat 10. maj 2013-imi saqqummissapput


Suluup aataava toqummat

Anaana qasusoorpoq

Atuakkat Amalia Lynge Pedersenimit allagaapput Christian Fleischer Reximillu assiliartalersugaallutik.

Atuakkat oqaluuserisanik artornartunik paqumigineqartartunillu imaqartut, meeqqanillu (5-iniit 10-nik ukiulinnik) oqaloqateqarnermi atugassiat marluk nutaat saqqummernissaat Ilaqutariinnermut Naalakkersuisoqarfiup isumagaa.

Atuakkat danskisuut marluk aallaaviusimapput, tassaasut Da Martins bedstefar døde aamma Mor er psykisk syg Anna Rosenbeckimit Inger Thormannimillu atuakkiarineqarsimasut.

Oqaluttuarineqartut Cand. psych. Amalia Lynge Pedersenip nunatsinni pissutsinut naleqqussarlugit allassimavai, Christian Fleischer Rexilu nutaarluinnarnik assiliartalersuisuuvoq.

Atuakkat taakku marluk meeqqat inersimasullu oqaluuserisassanik artornaraluarlutik, meeqqalli oqaasertalersuinissaannut misigissutsinillu anitsinissaannut pingaaruteqartunik oqaloqatigiissuteqarneranni aallaavittut atorneqarsinnaapput.

Atuakkami Suluup aataava toqummat eqqartorneqarput napparsimaneq, toqu ilaquttamillu qanigisamik annaasaqarnermi aliasunneq. Tamanna meeqqanut siusinnerusukkut annaasaqarnermik misigisaqarpallaarsimanngitsunut aammalu aliasunnerminni, inersimasut nammineq aliasunnerat pissutigalugu arajutsineqaratarsinnaasunut sakkortusinnaavoq.

Anaanap allarluinnarmik pissusilersulernera takullugu meeraq aliasulerlunilu annilaangalersinnaavoq. Suna asuleernerua sunalu piviusuua? Aammami ilaqutariinni ajornartorsiuteqartoqartillugu/-napparsimasoqartillugu meeqqat ‘puigorneqaratarsinnaapput‘. Taannaavoq atuakkap Anaana qasusoorpoq imaa.

Taakkununnga assingusut 2011-mi saqqummersut tassaapput Anaana ataatalu aalakooraangata aamma Anaana ataatalu annersaagaangata.

Atuakkat milik publishing suleqatigalugu saqqummersinneqarput.

Suliffeqarfinnut assigiinngitsunut akeqanngitsumik agguaanneqassapput.

Aamma atuakkanik atorniartarfinni atorniarneqarsinnaapput aammalu atuagaarniarfinni niuertarfinnilu allani 149 kr.-inik akilerlugit pisiarineqarsinnaallutik.

Saqqummersinneqarnerat malunnartinniarlugu tallimanngornermi 10. maj, nal. 15-17 Katuap Inersuaaraani ilasseqatigiittoqassaaq. Naalakkersuisoq Martha Lund Olsen oqalugiassaaq Amalia Lynge Pedersenilu atuakkat pillugit nassuiaateqassalluni.

Kikkulluunniit tikilluaqqusaapput!