Riiskovimik suleqateqarneq

Peqqinnissaqarfiup tarnikkut nappaatilinnut napparsimavimmik Risskov-imiittumik suleqateqarnera

Tarnikkut nappaatilinnut napparsimavimmi Risskov-imiittumi kalaallinit napparsimasunit aamma uninngavigineqartartumi pissutsinik arlaannaannulluunniit attuumassuteqanngitsumik misissuisitsineq, pissutsinik isornaatilinnik arlalinnik takutitsivoq. - ”Misissuisitsinermi paasisat naapertorlugit immikkoortortami kalaallit uninngavigisartagaanni R3 –mi pissutsit ajornerpaajunngikkaluit, tassanissaaq sulisut uninngasullu isumaat naapertorlugit, pitsanngorsaanissamut periarfissaqarnera qulaajaavigineqarpoq”, taama oqarpoq nakorsat qullersaat Anne Marie Ulrik imalu nangippoq:

-”Peqqinnissaqarfimmi qullersaasugut Risskov-imi napparsimavimmut tikeraarnitsinnut atatillugu, pissutsit malinnaavigalutit qanimut paasiniaavigissavagut. Nalinginnaasumik napparsimavimmik suleqateqarnerput ajunngitsumik ingerlavoq, pisortallu tikillugit misissuisitsinermi paasisat qanoq iliuuseqarfiginiarneqarneri pillugit oqaloqatiginissaat qilanaaraarput”.

Ulluinnarni suleqatigiinneq Dronning Ingridip Napparsimavissuani tarnikkut nappaatilinnut immikkoortortaqarfimmi pisortat Risskov-imilu immikkoortortap R3-p qanimut su-leqatigiinnerisigut ingerlanneqarpoq. Qaammatit tamaasa R3-mi A1-imilu sulisut qarasaasiakkut naapeqatigiissinneqarlutik ataatsimeeqatigiittarput, tassanilu napparsimasut ataasiakkaat nappaataasa suussusaat qanorlu ingerlaneri oqallisigineqartarput. Napparsimasoq inuiaqatigiinnut ikaarsaarniartussangoraangat A1 imut unitsinneqartarpoq tassanilu ikaarsaarnissaq piareersarneqartarluni.

Ukiut tamaasa A1-imi-, Risskov-imi-, kommunit pisortaqarfiisa ataanni najugaqatigiiffinni pinerlussimasunillu isumaginnittoqarfimmi pisortanit peqataaffigineqartumik ataatsimeersuartitsisoqartarpoq. Tassani napparsimasut, katsorsaariaatsit pisortaqarfiillu akornanni nalinginnaasumik suleqatigiinnerup pitsanngorsaaviginissaa oqallisigineqartarput.

Misissuisitsinermut atatillugu ukiut kingulliit marlussuit ingerlanerini aaqqissuulluagaaneroqisumik siunnerfeqarnerusumillu- ass. katsorsaanermut pilersaarusiortoqartalersoq, R3-mi sulisut oqaatigaat. Immikkoortortami suliassap annertunerujussuarmik sammineqalerneranik tamanna nassataqarpoq. Maleruagassat nutaat ass. napparsimavik qimallugu sammisaqartarnerit killilersuiffigineqarnerat annertugineqarluni, immikkoortortamiinneq napparsimasunit arlalinnit ilungersunartutut nalilerneqarpoq.

Paasissutissat sukumiinerusut:
nakorsat qullersaat Anne Marie Ulrik oqarasuaatikkut: +299 34 43 19 imal. e-mail-ikkut: sundhedsledelsen@peqqik.gl attavigalugu pissarsiarineqarsinnaapput.