Aatsitassanut politikki

Kalaallit Nunaanni inuussutissarsiornermut aatsitassanullu politikki nutaaq pillugu nunat tamalaat saqqummiivigineqarput

Kalaallit Nunaanni inuussutissarsiornermut aatsitassanullu politikki nutaaq pillugu nunat tamalaat saqqummiivigineqarput

Inuussutissarsiornermut, Aatsitassanut Suliffeqarnermullu Naalakkersuisup Jens-Erik Kirkegaardip naalagaaffiit aallartitaai Danmarkimiittut inuussutissarsiornermut aatsitassanullu politikkimik nutaamik saqqummiiviginiarlugit naapippai. Naalakkersuisooqatigiit Siumut, Atassut aamma Partii Inuit isumaqatigiilluinnarlutik inuussutissarsiornermut politikkeqarput, tassa niuerneq ammasumik killilersugaanngitsumillu sinaakkuteqarluni ineriartortinneqartuassasoq .

Naalakkersuisunut ilaasortap Jens-Erik Kirkegaardip Naalakkersuisut Kalaallit Nunaanni anguniagaat pilersaarutaallu pillugit assigiinngitsunik saqqummiussaqarpoq:

- Aatsitassanut radioaktivenik qinngornilinnut nutaamik politikkeqarput, tassa Naalakkersuisut aatsitassanut qinngornilinnik attuilluinnanngeqqusinerup atorunnaarsinneqarnissaanut Inatsisartut 2013-imi ukiaanerani ataatsimiinnissaannut tunngaviusumik aalajangertoqarnissaanut siunnersuuteqassapput.
Aatsitassarsiornermi suliniutit akileraarusersuiffigineqarneranni akileraarutit qaffanngikkaluarlugit akileraaruseeriaatsip allatut ilusilersorneqarnissaa.

Naalakkersuisut Kalaallit Nunaata kangiata avannaani uuliasiorfissat arlalinnut suliariumannittussarsiuunneqarnerat ingerlatiinnarpaat, uuliasiorluni misissuinerit maannamut killiffiat qaffasissoq attatiinnarumallugu.

Jens-Erik Kirkegaard saqqummiussereernermini danskit aamma nunat allamiut tusagassiortuinit apersorneqarnissaminut periarfissiivoq.

- Nunarsuarmi inuiaqatigiinnut Kalaallit Nunaanni aatsitassanut politikki patajaatsoq unammilleqatigiissutaalluarsinnaasorlu attatiinnarneqartoq pillugu saqqummiussinissamut periarfissinneqarnera pitsaalluinnarpoq. Ukiunilu aggersuni aatsitassarsiornermi suliniutissanut uuliasiorlunilu misissuisoqarnissaanut isumalluarpunga”, Inuussutissarsiornermut, Aatsitassanut Suliffeqarnermullu Naalakkersuisoq Jens-Erik Kirkegaard oqarpoq.

Pilersaarutit naapertorlugit Naalakkersuisunut ilaasortaq Jens-Erik Kirkegaard maanna Stockholmiliassaaq, Nunat Avannarliit Siunnersuisoqatigiivisa suliffeqarneq pillugu majip 16-anni ataatsimiinnissaannut peqataassalluni. Ataatsimiinnermi inuusuttut suliffissaaleqisarnerisa iliuuseqarfiginiarneqarnerat sammineqassaaq