Aningaasarsiorneq aallartippaat

Naalakkersuisut aningaasarsiornermut ineriartortitsinissamut aamma suliffissaaleqinerup akiornissaanut pilersarutaat pillugit Naalakkersuisunut ilaasortaq Jens-Erik Kirkegaard tusagassiortunut katersortitsinermi majip 21-anni saqqummiussaqarpoq.

Naalakkersusiut kommunet suleqatigalugit 2013-imi immikkut ittumik suliffissaaleqisut ikilisinniarlugit aningaasanik 33 mio. kr. atuissapput. Aatsitassanut ilinniarfimmi allanilu sulianut pikkorissartitsinernut, inuussutissarsiorfiit nutaat, nuttarnerulersitsiniarneq aamma suliffinnik ujartuineq pillugit suliffissaaleqisunut pikkorissartitsinernut. Inuusuttut sannavinni sulinissaannut suliniutinut. Piareersarfinnilu atuagarsorluni piginnaanngorsaanermi suliniutit il.il. aningaasat atorneqassallutik.

Tusagassiortunik katersortitsinermi saqqummiussat

Nipitaa

Assit

Inuusuttunut 30-it inorlugit ukiulinnut suliniuteqarneq annertusarneqassaaq. Sannavinni ingerlatsinernut aamma Timi Asimitut ittunik ingerlatsinernut aningaasassat amerlanerusut atorneqassallutik. Piginnaanngorsaqqiinermut suliniutit annertusarneqassapput. Suliniutit taakkua saniatigut Naalakkersuisut pilersaaruteqarput, iluarsaassinissamut suliniutinik taamaasilluni suliffissaqarniarneq piffissaq qaninnerusoq isigalugu pitsanngussammat.

Aatsitassarsiornermi suliniutinit arfinilinnit piianissamut akuersissutinik qinnuteqaatinut 2013-imi 2014-imilu isummertussaavugut, Jens-Erik Kirkegaard ilisimatitsivoq nangillunilu:

- Suliniut ilaannaaluunniit aallartikkaluarpata sulisinnaasut 1000t suliffissaqartinneqalissapput, soorlu maskinanik suliaqarsinnaasut, qaarsummi sulisut, elektrikerit kiffartuussinermillu sullissisinnaasut, Aatsitassarsiornermilu suliffeqarfissuit arlallit piiaanissamut akuersissutissat allat pillugit maanna oqaloqatigineqarput.

Tusagassiortunik katersortitsinermi aamma ilisimatitsissutigineqarpoq:
Aatsitassanut qinngornilinnik attuilluinnanngeqqusinerup atorunnaarsinneqarnissaanut Naalakkersuisut Inatsisartut 2013-imi ukiaanerani ataatsimiinnissaannut tunngaviusumik aalajangertoqarnissaanut siunnersuuteqassasut. Inatsisartut tunngaviusumik aalajangernissamut akuersissappata, aaqqissugaaneq aamma malittarisassat naleqqussarneqarnissaannut sulineq annertooq aallartinneqassaaq.

Naalakkersuisut aamma kissaatigaat uuliasiorluni misissuinerit killiffiat manna qaffasissoq attatiinnarneqasasoq. Qillerilluni uuliamik misissuinissammut akuerississutit atuukkunnaaraangata akuersissutit nutaat tunniunneqartassapput. Ukiuni aggersuni uuliamik ujaasinissamut akuersissutinik qinnuteqaatit 2013-ip naannginnerani tiguneqareernissaat naatsorsuutigineqarpoq. Qinnuteqaatit malittarisassat ingerlatseriaatsillu naapertorlugit suliarineqassapput.

Naalakkersuisunut ilaasortaq Jens-Erik Kirkegaard annerusumik paasisaqarfigerusukkukku, attigiviuk: Naalakkersuisup allattaa Kirsten Enequist, 583754