Ikerinnarsiortunik 2013-imi misileraalluni aalisarneq


Aalisariutaatileqatigiiffinnit qinnuteqaatit arlallit Naalakkersuisut ulloq 2. maj 2013 ataatsimiinnermi akueraat aammalu Tunumi 2013-imi makrelinik, ammassassuarnik, blåhvillinginik guldlaksinillu misileraalluni aalisarnissamut pisassiissutit aalisarsinnaanermullu akuersissutit agguaallugit.

Misileraalluni aalisarnermut tassunga pisassiissutit makrelit 15.000 tonsit, ammassassuit 10.000 tonsit, blåhvillingit 10.000 tonsit kiisalu guldlaksit 10.000 tonsit ukioq manna siusinnerusukkut aalajangerneqarput. Pisassiissutit taakku Naalakkersuisut ataatsimiinnermi agguaappaat.

Paasineqarnikuuvoq aalisakkat ikerinnarsiortut ukiuni kingullerni kimmut siaruariartornikuusut. Taamaalilluni siorna Tunumi makrelit 5.220 tonsit pisarineqarput. Misileraanerup qanoq aalisakkat taakku siaruarsimatiginersut takutissavaa kiisalu qanoq pisaqartoqarsinnaanersoq tikkuussissalluni.

Taamaattumik Naalakkersuisut neriuutigaat misileraaneq pitsaasumik ineriartussasoq, taamaattoqarpallu pisassiissutit tamakkerneqarpata pisassiissutit qaffannissaat Naalakkersuisut soorunami isumaliutigissavaat. Naalakkersuisut siunertaraat aalisarnissamut periarfissat tamarmik misissorneqassasut atorluarneqarlutillu.

Misileraalluni aalisarneq soorunami ingerlanneqasaaq Pinngortitaleriffik suleqatigalugu najoqqutassat suliarineqartut malillugit.