Aleqa Hammondip nunani avannarlerni ministeriunerit naapippai

Aleqa Hammond møder de nordiske statsministre

Aleqa Hammond maajip 15-ani 16-anilu nunat avannarliit Stockholmimi ataatsimiinneranni peqataavoq.

Nunani avannarlerni ministeriunerit suliffeqarnermullu ministerit maajip 15-ani 16-anilu Stockholm-imi ataatsimiissapput inuusuttut suliffissaaleqinerannik akiuineq immikkut sammissallugu.

Naalakkersuisunngorlaat periarfissaq iluatsillugu nunani avannarlerni suleqatissatik naapissavaat. Taama iliornikkut nunani avannarlerni suleqatigiinneq patajaallisarneqassaaq, soorlu tamanna Kalaallit Nunaata nunanut allanut politikkianut qitiusumik inissisimasoq – Aleqa Hammond-ip maajip 16-ani ministeriunerit naapissavai aammalu Naalakkersuisoq Jens-Erik Kirkegaard ullormi tassani ataatsimeersuarnermi suliffeqarnermut ministerit paasisimasallit oqallitsinneqarneranni peqataassaaq.

Issittumi Siunnersuisooqatigiinni suleqatigiinneq sammillugu ataatsimiinnerni oqaluuserineqassaaq. Pingaaruteqarpoq nunat avannarliit allat Issittumi Siunnersuisooqatigiinni aamma peqataasut – Norge-p, Finland-ip Island-illu – paasissagaat Issittumi Siunnersuisooqatigiinni pisut Kalaallit Nunannut ilungersunassusiat, aammalu pisumi matumani Danmark aamma Kalaallit Nunaat tapersersorumaaraat.

Aammattaaq periarfissaqassaaq nunani avannarlerni nunanik namminersorlutik oqartussaqartunik, Savalimmiunik Åland-imillu immikkut naapitsinissaq, suleqatigiinnerup patajaallisarneqarnissaanik anguniagaqarluni, nunani avannarlerni, aammali Savalimmiunut Kalaallillu Nunaannut atasumik Issittumi Siunnersuisooqatigiinnut atatillugu. Tamanna pisariaqarpoq ataatsimoorluta angusaqarniassagutta.

”Naalakkersuisut nunanut allanut politikkiminni nunat assigiinngitsut suleqatigiinneranni pingaarutilinnik arlalinnik peqataaffeqarput, nunanullu avannarlernut tunngasut maanna ukiuni 30-ngajanni naalakkersuinikkut suleqatigiinnitsinni qitiusumik inissisimavoq.” Aleqa Hammond-ip oqaatigaa.

"Ukiuni kingullerni nunanit allanit nunarput pillugu annertuumik soqutiginninnerulersimaneq nuannaarutigaarput, kisiannili aamma ima isumaqarpoq, sumiiffinni tatiginninnermik ataqqinninnermillu takutitsiffiusartuni peqataanitta annertusartuarnissaa. Taama pineqartuaannarsimavugut nunani avannarlerni suleqatigiinnermut atatillugu” Aleqa Hammond naggasiivoq.