Nicki Sisimiuni 1 g-imi ilinniartunik ilinniartitsivoq

Ilinniartitaanermut, Ilageeqqarnermut, Kultureqarnermut naligiissitaanermullu Naalakkersuisoq sapaatip akunnerata naannerani Ilulissanut Sisimiunullu angalavoq.

Ilulissani PISPS (perorsaasunngornianut seminaria) ataatsimeeqqatigineqarpoq, tassani najugaq qimanngikkaluarlugu nuna tamakkerlugu perorsaasusutut ilinniagaqalersinnaaneq eqqartorneqarluni. Nick Nielsen socialassistentitut ilinniarnerminnik naammassisut 13-t allagartartaarnersiortut najuuffigaattaaq.

Nick Nielsen oqaluginiarnermini ilaatigut oqarpoq: ”Perorsaasut ilinniarsimasut isumaginninnermillu suliaqartut nunatsinni amigaataasorujussuupput. Taamaattumik tamassi ataasiakkaarlusi atorfissaqartinneqarpusi. Neriuppunga isumaginninnermi asissistentitut ilinniagarsi perorsaasutut ilinniaqqinnissamut alloriarfittut amerlasuut atussagaat, paaqqinnittarfinni perorsaasut pisariaqartinneqartut inuuttalerneqarsinnaaqqullugit”.

Qaasuitsup kommuneani Borgmesteritut ivertinneqallaap Ole Dorphip naapinissaa periarfissaqarfigineqarsimavortaaq, tassani atuarfiit illinniartitaanermullu tunngatillugu Naalakkersuisut kommunellu pilersaarutaat illuatungerilluni ilisimatitseqatigiiffigineqarput. Atuarfik Mathias Storchip iluarsarneqarnera eqqartorneqarpoq isumaqatigiissutigineqarlunilu suliaq pingaaruteqarluinnartoq illuatungeriit qanimut suleqatigiinnerisigut naammassineqassasoq.

Simiuni Nick Nielsen Naalakkersuisoqatini Miiti Lynge aamma Vittus Qujaukitsoq peqatigalugit nal. ak. pingasunik sivisussuseqartumik innuttaasunik ataatsimiititsinermi ornigarneqarluarlunilu apeqqutilliffigineqarluartumi peqataavoq. Ilinniartitaaneq eqqarsaatigalugu meeqqat atuarfianut meeqqat atuarfianillu tunngaviusumik ilinniartitaarnermut ikaarsaariarnermut tunngassuteqartut samminneqarnerupput. Innuttaasut angajoqqaat akisussaaffiisa pingaaruteqassusaat, atuartullu atuarnerminni tapersersorneqartarnissaanut pimoorissinissaanullu tunngasut eqqartorpaat.
Borgmester Hermann Berthelsen, Qeqqata Kommunia ataatsimeeqqatigineqarpoq, kommunip atorluaannissamik suliniutaa eqqartorneqarluni. Tamatuma saniatugut ulluunerani paaqqinnittarfiit, meeqqat atuarfiinut tunngatillugu Kommunip Namminersorlutik Oqartussallu suliniutaasa kiisalu Teknikimik Ilimmarfik, Arteq aamma ilinniartut inissaanik sanaartornerit pillugit pilersaarutit siunissami suleqatigiissutigineqarnissaat eqqartorneqarput.

Tamatuma saniatigut Sisimiuni ilinniarfiit: Knud Rasmussenip Højskolia aamma Teknikimik Ilinniarfik ataatsimeeqqatigineqarput.

Sanaartornermik Ilinniarfimmut pulaarnermi Nick Nilsen 1 g-mi ilinniartunik naapitsinissaminut periarfissinneqarpoq, tassanilu matematik-imik aamma kalaallisut pikkorissartitsipallalaarluni nammineq Aasianni GU-rsimanerminit oqaluttuanik akullattaartarlugit. Ilinniagassamik toqqaasanermut meeqqallu atuarfiani atuarnerminni misigisimasanut tunngassuteqartunik Nick Nielsen ilinniartunik oqaloqatiginninnissamut piffissaqarsimavortaaq.

Pisut naggaserlugit Naalakkersuisoq Nick Nielsen Illorput 2100-mik ilinniartut praktikkertut atorlugit misiligummik sananeqartumik nappaanersiornermi peqaavoq.

 
(asseq) Naalakkersuisoq Nick Nielsen ilinniartunik praktikkertunik Illorput 2100-mik nappaanersiortunik oqaloqatiginnittoq.