Akuersissutit pillugit

Sinerissap qanittuani aalisarsinnaanermut akuersissutit pillugit tusagassiorfinnut nalunaarut

Ulluni kingullerni sinerissap qanittuani aalisakkanik assigiinngitsunik aalisarsinnaanermut akuersissutit pillugit annertuumik eqqartuisoqarlunilu oqallittoqarpoq.

Aallaqqaasiullugu oqaatigissavara pissutsit pineqartut malittarisassat atuuttut, tassa inatsisit atuuttut, aallaavigalugit ingerlanneqarmata.

Maanna Naalakkersuisoqatigiit pilersinneqaramillu ersarissumik oqaatigisarpaat pissutsit tamakku allanngortinniarlugit. Naalakkersuisut kissaatigaat aalisarnermik inuussutissarsiuteqavissut kisimik aalisarsinnaanermut akuersissummik pisarnissaat kiisalu siusinnerusukkut aalisarnermik inuussutissarsiuteqarsimasut aammalu inuusuttut soorlu saarullinniarnermut aammalu qaleralinniarnermut ajornannginnerusumik aallar¬titsisinnaanissaat Naalakkersuisut kissaatigaat.

Piffissaq qaninnerusoq eqqarsaatigalugu Naalakkersuisut nalunaarutip atuuttup allanngortinnissaa pillugu siunnersuut tusarniaassutigalugu junimi nassiunniarpaat.

Piffissarlu ungasinnerusoq eqqarsaatigalugu Naalakkersuisut naatsorsuutigaat aalisarneq pillugu Inatsisartut inatsisaata allannguutissaat 2014-imi upernaakkut ataatsimiinnissami Inatsisartunut saqqummiunneqassasoq.

Naalakkersuisut taamaasillutik suliniutinik aallartitsereersimapput malittarisassat atuuttut allanngortinniarlugit aalisartunut atugassarititaasut pitsanngorsarniarlugit. Naalakkersuisullu erseqqissarumavaat taamatut allannguinerit aatsaat sukumiisumik tusarniaanerit ingerlanneqareerpata pisinnaassammata.

Inussiarnersumik inuulluaqqusillunga

Karl Lyberth
Naalakkersuisoq