Inuunerittamut qinnuteqartorpassuit

Peqqissutsimut Attaveqarnermullu Naalakkersuisoq Steen Lynge Inuunerittamut
aningaasaliissutinit suliniutinut assigiinngitsunut aningaasanik agguaassivoq.

Upernaaq manna Inuunerittamut aningaasaliissutinit qinnuteqarnissaq annertuumik soqutigineqarpoq. Suliniutit katillugit 36-it aningaasaliiffigineqarnissamut akuerineqarput 396.260 koruunillu agguaanneqarlutik.

Ilaatigut imigassaq hashilu pillugit oqallititsinerit paasissutissiinerillu aningaasaliiffigineqarput. Atornerluineq pinaveersaartinniarlugu - meeqqat angerlarsimaffinni atornerluiffiusuni peroriartortut imminnut tatiginerulernissaat anguniarlugu, timersornikkut
piginnaasanik inerisaaniarluni suliniutit - aningaasaliiffigineqarputaaq.

-”Inuunerittamut aningaasaliissutinut qinnuteqarnissamik soqutiginninnerup taama annertutiginera nuannaarutigeqaara. Taama amerlatigisut kajumillutik piumassuseqarlutillu najukkami peqqissuunissamut pinaveersaartitsinermullu suliniutinut akisussaaffimmik tigusinikkut, immikkut iliuuseqarnerat kusanaqaaq,” taama oqarpoq Peqqissutsimut Attaveqarnermullu Naalakkersuisoq Steen Lynge, nangipporlu:

-”Pitsaasunik qinnuteqaaterpassuaqarpoq. Naliliinermi ukioq manna imigassamik hashi-millu atornerluinermut tunngasut- innuttaasut peqqissuunissaat pillugu suliniummi Inuuneritta II-mi 2013-imi immikkut iliuuseqarfiginiakkat- tulleriiaarinermi pingaarnertut salliunneqarput”.

Qinnuteqaatittaaq meeqqanut, inuusuttunut ilaqutariinnullu suliniutinut tunngasut, naliliinermi pingaartinneqarput. Qinnuteqaatit ilinniagaqassutsimik akimuisut ass. suliniutit peqqissutsimut-, inuttut atukkanut- minnerunngitsumillu kulturimut tunngassuteqarnerat naliliinermi ilaatinneqarpoq.

Inuunerittamut aningaasaliissutit Kalaallit Nunaanni innuttaasut peqqissuunissaat pillugu suliniutip Inuunerittap siulliup atuutilersinneqarneranut atatillugu immikkoortinneqarput. Aningaasanik peqqissuunissamut pitsaaliuinermullu tunngatillugu suliniutinut atugassa-nik ukiumut marloriarluni qinnuteqartoqarsinnaavoq.

Inuunerittamut aningaasaliissutinik qinnuteqarfissaq tulleq 2013-imi oktobarip aallaqqaataanut killeqarpoq, tamatumani aamma suliniutit imigassamut hashimullu tunngasut pingaarnerutinneqassapput. Qinnuteqarfissaq aningaasaateqarfimmullu tunngatillugu paasissutissat sukumiinerusut nittartakkami www.paarisa.gl pissarsiassaapput.

Paasissutissat sukumiinerusut peqqinnissaq pillugu siunnersorti Lisa Christiansen oqarasuaatikkut: +299 34 66 50 imal. e-mail-ikkut: lich@nanoq.gl attavigalugu pissarsiarineqarsinnaapput.