INI A/S-ip ataatsimeersuarnera

Aleqa Hammond, INI A/S-ip Sisimiuni ileqquusumik ataatsimeersuarnerani peqataavoq

Naalakkersuisut Siulittaasuat, Aleqa Hammond, INI A/S-ip Sisimiuni ileqquusumik ataatsimeersuarnerani peqataavoq. INI A/S Namminersorlutik Oqartussanit tamakkiisumik pigineqarpoq Sisimiunilu ataatsimeersuarfiusumi pingaarnertut allaffeqarfeqarluni.

Naalakkersuisunit ingerlatseqatigiiffimmi periusissiortoqarsimanera nuannaarutigineqarpoq, INI-milu sunniuteqarluartumik patajaatsumillu ingerlatsinissaq pingaarnertut anguniagaavoq. Suliaq tamanna ingerlatseqatigiiffiup ineqarnermullu tunngasut ineriartortinneqarnerannut pitsanngorsaataasinnaavoq.

Ataatsimeersuarnermi ingerlatseqatigiiffiup aningaasaqarneranut pitsanngorsaatit pisariaqartinneqartut Aleqa Hammondip oqaatigivaa. Ingerlatseqatigiiffik akileraarutit akilereernerini 2,1 mio. kr.-inik amigartoorfiuvoq. Naalakkersuisulli naatsorsuutigivaat periusissiamik nutaamik suliaqarsimaneq 2013-mut aningaasaqarnikkut pitsaanersumik angusaqartitsissasoq.

Siulersuisut ukuupput:

  • Siulersuisuni siulittaasoq Jette Larsen
  • Siulersuisuni ilaasortaq Lissi Olsen
  • Siulersuisuni ilaasortaq Kristian May
  • Siulersuisuni ilaasortaq Bjarne Krog-Jensen
  • Siulersuisuni ilaasortaq Erik Jensen (sulisut toqqagaat)
  • Siulersuisuni ilaasortaq Jonas Jensen (sulisut toqqagaat)

Ukiuni kingullerni misilittakkat ineriartornerullu takutippaat INI A/S-mi aningaasaqarnikkut aqutsinerup ineqarnikkullu immikkoortortaqarfinni aningaasatigut ingerlatsinerup iluani suli pitsanngorsaasoqarsinnaasoq. Suliap tamatuma piviusunngornissaanut qilanaarpunga, Aleqa Hammond naggasiivoq.



Naalakkersuisut siulittaasuat, Aleqa Hammond, aamma Ineqarnermut, Pinngortitamut Avatangiisinullu Naalakkersuisoq Miiti Lynge kiisalu A/S INI-p siulersuisui aamma suliffeqarfiup pisortaanera Jokum Mølgaard.