Great Greenland ataatsimeersuartoq

Great Greenland A/S-ip ukiumoortumik nalunaarutaata takutippaa 2012-imi tunisat amerleriarsimasut.

Great Greenland A/S-imi ileqquusumik ataatsimeersuarneq ingerlanneqaqqammerpoq.

Ataatsimeersuarnermi ingerlatseqatigiiffiup kaaviiaartitaasa amerleriarsimanerat naammagisimaarlugu Aleqa Hammondip oqaatigaa:
”Puisit amiisa toqqortaatigiinnarneqaratik piumaneqarnerisa annertuseriarsimaneri paasillugu nuannerpoq. Massakkut atuisartunit nuannaarutissanngorlutik atorluarneqarsinnaalerput Great Greenlandillu aningaasatigut isaatitsisinnaaneranut iluaqusersuilerlutik.”

Ammit tunineqartut amerleriarsimaneri kaaviiaartitat annertuseriarnerinut tunngaviupput. Great Greenlandip sulissutigisimavaa siornatigut tunitsiviusarsimasut piffissami sivisuumi pisiumajunnaarsimasut tunitsiviuleqqinnissaat. Kaaviiaartitat 2011-imi 8,8 mio. kr.-init 2012-imi 14,5 mio. kr.-inut qaffariarsimapput.

Great Greenland Katalog 2013

Ingerlatseqatigiiffiup kaaviiaartitai ajunngitsup tungaanut ingerlagaluartut ingerlatseqatigiiffik 5,8 mio. kr.-inik amigartooruteqarpoq. Amigartooruteqarnermut patsisaasoq tassaavoq ammit tunineqarnerini akit appasippallaarsimaneri 2012-imilu tunisartakkat appariarujussuarsimanerinik. Angusat Siulersuisunit piginnittunillu naammagisimaarneqanngillat.

Great Greenland A/S ataatsimeersuarnermi aningaasanut inatsisikkut immikkoortinneqarsimasunik 5 mio. kr.-inik aningaasaliiffigineqarpoq.
”Immitsinnut piumaffigeqatigiittarnerput pitsanngortittariaqarparput. Great Greenland A/S ikiorserneqaqqittariaqalissagaluarpat tamanna sullissinissamik isumaqatigiissutitigut takussutissaqartinneqartariaqarpoq. Neriuppunga tamanna pisariaqassanngitsoq naatsorsuutigaarpullu Great Greenland A/S siunissami ajunnginnerusumik ingerlalissasoq.”

Ileqquusumik ataatsimeersuarnermi siulersuisut katitigaanerat allanngortinneqarpoq. Aaja Chemnitz qanittukkut TelePost A/S –ip siulersuisuinut ivertinneqartoq Great Greenland A/S –imit anivoq. Taarsiullugu Nauja Bianco Great Greenland A/S –ip siulersuisuinut ivertinneqarpoq. Nauja Bianco puisit pillugit EU –mi politikkimik ilisimasaqarpoq aamma kalaallit inuiaqatigiinni inerikkiartornerannik ilisimaarinnilluartuulluni.

Siulersuisut katitigaanerat
Great Grenland A/S-imi siulersuisuni ilaasortat makkuupput:
• Bruno Olesen (Siulittaasoq)
• Nauja Bianco
• Mike Nicolaisen
• Karen Simonsen