Nunani avannarlerni suliffeqarnermut ministerit

Jens-Erik Kirkegaardip nunani avannarlerni suliffeqarnermut ministerit Stockholmimi majip 16.-anni ataatsimiittut peqataaffigai

Inuusuttut suliffissaaleqisarnerata iliuuseqarfiginiarneqarnerat ataatsimiinnermi sammineqarpoq.

Nunani avannarlerni aamma nunani namminersortuni inuusuttunut suliffissaaleqisunut iliuuseqarluni aaqqiissuteqarniarnermi misilittakkat avitseqatigiissutigineqarput.

Ataatsimiinnermi pingaarnertut anguniarneqarpoq ”Best practise” , tassa nunani assigiinngitsuni periutsit pitsaanerit, avitseqatigiissutiginissaat.

Jens-Erik Kirkegaardilu inuusuttortatta suliffeqalernissaannut ilinniagaqalernissaannullu Piareersarfinni aqqutissiuunneqarnissaannut periuserineqartut pillugit saqqummiussinnissaminut periarfissinneqarpoq.

Suliffeqarnermut ministerit ataatsimiinnerini naqissuserneqarpoq inuusuttunut arlalinnik aqqutissiuussinissaq pisariaqartoq. Aningaasaqarnikkut politikkip pingaarnertut qulakkeertariaqarpaa pisortat ingerlataanni suliffeqarfinni suliffissat pilersinneqartariaqartut, tulliatullu inuusuttunut sammisunik iliuusissanik pilersitsisariaqarpugut, taamatullu iliuuseqarniarnermi piffissaq, siunnersuineq isumaginninnerlu tunaartarineqartariaqarput.

Ukiuni aggersuni inuusuttut amerlanerpaat inuttut ineriartornissaat anguniartariaqarparput, pisortani namminersortunilu suliffeqarfinni sulilersinnaasutut piginnaasaqalerlutik ilinniagaqalerniassammata. Aalisarneq, aatsitassarsiorneq aamma takornariaqarneq inuiaqatigiit atugarissaarnissaannut tunngaviussapput, Jens-Erik Kirkegaard oqarpoq.