Ukioq TELE POST-imut angusaqarfiulluartoq

Ukioq 2012 Tele POST-imut ukioq naatsorsuiffittut angusarissaarfiuvoq. 2012-mi kaaviiaartitat 34,5 mio. kr.-inik qaffariaateqarput. Angusat akileraarutit akilereerlugit 71,3 mio. kruuniupput 2011 –imi 48,3 mio. kruuniusut. Ingerlatseqatigiiffik pissarsianik 75 mio. kr.-inik akiliissaaq. Aningaasatigut pitsaasumik ineriartortitsineq suli annertunerusumik inuiaqatigiinni ineriartortitsinissamut periarfissiimmat Naalakkersuisut nuannaarutigaat.

Naalakkersuisut ingerlatseqatigiiffik peqatigalugu piffissaq ungasinnerusoq isigalugu ineriartortitsinissamut sinaakkutissaq tamanut atugarissaartitsisussaq sulissutigivaat, pingaartumik internetip tungaatigut atuisut akiliutaasigut pitsanngorsaanissap qulakkeerneqarnissaa eqqarsaatigalugu. Ineriartortitsineq tamanna periusissiamut IKT-mut piffissami aggersumi nalilerneqaqqittussamut tulluarsagaassaaq. Periusissiami IKT-mi attaveqaqatigiinnikkut sinaakkusiineq toraagassiinerlu aalajangersorneqassapput. Tassani peqqinnissaqarfimmi nalunaarasuartaatikkut attaveqaqatigiinnermik atuineq, kiisalu meeqqat inuusuttullu internetimik atuisinnaanerat Naalakkersuisunit immikkut ukkatarisassatut inissisimassapput.

Naalakkersuisut siulittaasuat Aleqa Hammond imatut oqarpoq: ”Meerartatta inuusuttattalu ilinniagaqarnikkut ineriartornikkullu pitsaasumik atugassaqartinnissaat pingaaruteqarpoq, taamaattumillu Naalakkersuisuniit ilinniagaqarfiit ilinniartunullu inissiat internetitigut atugarissaartuunissaat sulissutigissavarput”.

Siulersuisuni ilaasortaq nutaaq

Margrethe Sørensen taarserlugu Meeqqat illersuisuat Aaja Chemnitz Larsen siulersuisuni ilaasortatut Naalakkersuisut nutaatut toqqarpaat. Naalakkersuisut Margrethe Sørensenip ukiorpassuarni siulersuisuni tunniussimalluni sulisimaneranut qujassuteqarput.

Aaja Chemnitz Larsenip siulersuisuni sulinissamini meeqqanut inuusuttunullu tunngasutigut paasisimasaqartuunini suliallu naalakkersuinikkut qanoq suliarineqartarnerannut attaveqaqatigiinnermullu tunngasutigut lisimasaqartuunini ilaatigut piukkunnaatigivai.

Siulersuisut tassaalissapput:

  • Agner Mark (Siulittaasoq)
  • Søren Voigt
  • Line Frederiksen
  • Aaja Chemnitz Larsen
  • Benedikte Jensen (sulisunit toqqarneqartoq)
  • Svend Åge Olsen (sulisunit toqqarneqartoq)