Norskit misilittagaat NUNAOIL-mut iluaqutaassaaq

NUNAOIL-ip ukiumi qaangiuttumi ”NUNAOIL A/S pillugu nassuiaammeersut” kaammattuutit atortussanngortinneqarnissaat sulissutigisimavai. Nassuiaat Inatsisartunut upernaakkut 2012 –mi ataatsimiinnermi agguaanneqartoq ingerlatseqatigiiffiup ineriartornissamut aammalu iluanaarutitigut aningaasalersuinikkut aamma taarsigassarsisarnikkut politikki aalajangersarneqarput. Nassuiaammut tapiliussatut ingerlatseqatigiiffiup periutsini iluarsaassimavaa taamaasilluni taanna ineriartornissami anguniakkamut naapertuunnerusunngorluni tassalu uuliasiorluni ingerlatseqatigiiffiunissaq nammineerluni uuliamik ujarlerlunilu piiaasuunnginnissamik, killilimmik inuttaqarluni Namminersorlutik Oqartussat soqutigisaannik akuersissutini pigisatigut pisassani isumaginnittuusoq. Ineriartornermut maligassiuisoq tassaavoq norskit ingerlatseqatigiiffit Petoro, norskit naalagaaffiannut assingusunik suliassanik isumaginnittartuusoq.

Taamatut nutaamik periusissatigut sammisaqalernikkut Naalakkersuisunit assut isumalluarfigineqarpoq tassalu ingerlatseqatigiiffiup siunissami suliassat isumagilluarsinnaassagai uuliasiornerup tungaatigut ineriartornermut atatillugu.

Siulersuisunut siulittaasoq Kaare Hagemann ukiut 21-it NUNAOIL-ip siulersuisuineereerluni kissaateqarsimavoq siulersuisuni ilaasortaanerminit tunuarniarluni. Naalakkersuisunit Kaare Hagemann suliaqarsimaneranut qutsateqarfigineqarpoq kissaanneqarlunilu pitsaasumik eqqortumillu atugaqarluni soraarninngorluarumaartoq.

Siulersuisuni siulittaasup tulliata Frank D. Pedersen-ip siulersuisunut siulittaasuuneq tigussavaa. Naalakkersuisunit qilanaarineqarpoq ingerlatseqatigiiffimmit NUNAOIL pillugu nassuiaammi kaammattuutigineqartut atuutilertussanngortinniarneqarnerisa ingerlateqqinneqarnissaat.

Ineriartornissamut NUNAOIL-ilu pillugu nassuiaammi kaammattuutigineqartut atuutilersinneqarnissaanni pitsaanerpaanik atugassaqartitsinissaq qulakkeerniarlugu Naalakkersuisunit toqqarneqarsimavoq Olav Boye Sivertsen-ip qinerneqarnissaa, taanna ulluinnarni NUNAOIL-imut maligassiuisumi Petoro A/S-imi inatsisilerinikkut pisortaasoq. Olav Boye Sivertsen-ip siulersuisut inatsisilerinikkut pingaarnerusutigut piginnaasaqalersissavai kiisalu misilittagaqartilissallugit uuliasiorluni inuussutissarsiornermi aamma aatsitassarsiornermik ingerlatsivimmi sivisuumik qaffakkiartorsimanerminit. Takuuk aamma http://www.petoro.no/om-petoro/organisasjon/juridisk

Siulersiuisut siunissami ukuninnga inuttaqassapput

Frank d. Pedersen – Siulittaasoq
Tine Pars
Lida Skifte Lennert
Olav Boye Sivertsen
Peter Steen Helmer (danskit naalagaaffianit toqqagaq)
Naalakkersuisunit Olav Boye Sivertsen siulersuisunut tikilluaqquneqassaaq siulersuisuusullu kiisalu ingerlatseqatigiiffimmi sulisuusut qutsateqarfigineqassallutik ukiumi qaangiuttumi sulisimanerannut.