Naalakkersuisuni suliassanik naleqqussaaneq


Nunani Avannarlerni Suleqatigiinneq

Naalakkersuisut suliassarpassuatik nunatsinnut iluaqutaasumik aaqqinneqartariaqartut aallartissimalerpaat. Tassunga atatillugu Naalakkersuisunit suliassat suliarineqartarnerat naleqqussarneqarsimavoq, taamaasilluni Miiti Lynge (PI) siunissami Nunani Avannarlerni Suleqatigiinnermut Naalakkersuisutut suliassanik isumaginnittartunngorluni.

Naalakkersuisut Siulittaasuat, Aleqa Hammond:

- Nunani allanik suleqateqarneq nunatsinnut pingaaruteqartorujussuuvoq. Taamaattumik uannut, Naalakkersuisut Siulittaasuattut, immikkut pingaaruteqarpoq, Kalaallit Nunaata tutsuiginartumik pimoorussaasumillu nunani avannarlerni suleqatigiinnermi, uagut nammineq susassaqarfitsinni, pisussaaffimminik isumaginnittarnissaa.

Naalakkersuisunut ilaasortat namminneq susassaqarfimminnut atatillugu nunarput Nordisk Ministerrådimi sinniisuuffigisassavaat, suleqatigiinnerlu taanna Suleqatigiinnermut Ministerit suleqatigiinnerisa saniatigut Ministerit ataasiakkaat suliaminnut atatillugu ministerrådianni pisarpoq.

Naalakkersuisut Siulittaasuat Aleqa Hammond Naalakkersuisut sinnerlugit Nunani Avannarlerni Siunnersuisoqatigiit ukiumoortumik ataatsimiinneranni kiisalu Nunani Avannarlerni naalakkersuisut siulittaasuisa ataatsimiinneranni peqataasassaaq.

Naalakkersuisut Siulittaasuata tullianik toqqaaneq

Peqqissutsimut Attaveqarnermullu Naalakkersuisoq, Steen Lynge (A) Naalakkersuisut Siulittaasuannit Aleqa Hammond-imit (S) toqqarneqarpoq Naalakkersuisut Siulittaasuata tulliatut.

Steen Lynge Naalakkersuisut siulittaasuata tullersortaatut atuuttassaaq pisuni, soorlu Naalakkersuisut Siulittaasuat sulinngiffeqartillugu imaluunniit pissutsit allat pissutigalugit pisumi aalajangersimasumi peqataasinnaatinnagu.