Naalakkersuisut siulittaasuat Amalienborgemi

Naalakkersuisut siulittaasuat Aleqa Hammond Dronningimit Amalienborgemut siullermeerutaasumik tikilluaqquneqarpoq

Naalakkersuisut siulittaasuata Aleqa Hammondip Danmarkimi tikeraarnermini Dronningi ilanngullugu naapippaa. Tamanna pivoq pingasunngornermi nal. 11.30 Amalienborgimi Dronningimit tikilluaqquneqarami. Ataatsimiinnermi ileqqoq nutaaq eqqunneqarpoq, tamannalu pillugu Aleqa Hammond oqarpoq:

- Tulluusimaarpunga Naalakkersuisuni siulittaasunngorlaap Dronningillu akornanni taamatut aaqqissuussisoqartalerneratigut ileqqumik nutaamik aallarniisinnaagama, tassalu Naalakkersuisunut siulittaasunngortup Danmarkimut tikeraaqqaarneranut atatillugu Dronningimik naapitsisalernissamik.


Aleqa Hammond Amalienborgemi
Dronningip Naalakkersuisuni siulittaasoq Aleqa Hammond Amalienborgimi illussaarsuarminut tikilluaqquaa pingasunngornermi nal.11.30, tassani Naalakkersuisut siulittaasuata Kalaallit Nunaanni qinerseqqammerneq Naalakkersuisooqatigiinnissamillu isumaqatigiissutip pingaarnertai naatsumik nassuiaateqarfigai. Ataatsimiinnermi Kunngissaq peqataavoq ataatsimiinnerlu minutsit 45-t missaanik sivisussuseqarpoq. Naalakkersuisunut Siulitaasoq Aleqa Hammond ima oqarpoq:

- Dronningilu kisitta naapinnissarput pilersaarutaaqqaarsimagaluarpoq, nuannaarutigeqisannilli Kunngissaq ataatsimiinnermi peqataavoq. Kunngissap ataatsimeeqataanermigut nunatsinnut soqutiginninnini takutippaa. Tamannalu nuannaarutigeqaara.