Aleqa Hammond Danmarkimi

Naalakkersuisut siulittaasortaavat Aleqa Hammond sapaatip akunnerani uani siullermeerutaasumik Danmarkimut angalavoq Statsministeri Dronningilu naapissallugit. Tikeraarneq oqaluttuarisaanermut ilanngunneqartussaq. Tassami Naalakkersuisuni siulittaasut arnat naapinnerisa saniatigut ileqqoq nutaaq eqqunneqarmat, tassalu Naalakkersuisut siulittaasuata Danmarkimut angalaqqaartarnerani Dronningi naapinneqartartussanngormat.


Naalakkersuisut siulittaasuata Aleqa Hammondip siulliullugu Statsminister Helle Thorning-Schmidt ornippaa
Naalakkersuisuni siulittaasunngoqqammersumit Aleqa Hammondimit pingaartinneqarsimavoq nunatta siuttussaatut taamaasillunilu Naalakkersuisuni siulittaasussatut toqqarneqarnermi kingorna pisortatigoortumik tikeraarnermi siullermi statsminister Helle Thorning-Schmidtimik naapitseqqaarnissani. Tamannalu pivoq ullumi 16. april nal.14.30, Statsministeriami tikilluaqquneqarmat.


Naalakkersuisut siulittaasui marluusut ataatsimeeqatigereermata Aleqa Hammond ima oqarpoq:
- Inuussutissarsiutit eqqarsaatigalugit Kalaallit Nunaata Danmarkillu suleqatigiinnerulernissaat Kalaallit Nunaannit tikilluaqquneqarpoq, neriuutigaaralu tamanna kalaallit danskillu inuussutissarsiortuisa ilaannut inuussutissarsiutinik nutaanik aallartitsinissamik periarfissiiumaartoq. Niuernikkut atugassarititaasut naliginnaasut aqqutigalugit danskit Kalaallit Nunaanni aningaasaliinerusalernissaasa siuarsarneqarnissaa isumaqatigiissutigaarput. Pingaaruteqarpoq erseqqissaatigissallugu uani pineqanngimmat uuliasiorneq, gas-imik ujaasineq aatsitassarsiornerlu eqqarsaatigalugit ingerlatseqatigiiffinnik danskit kalaalillu nalaagaaffianit pigineqartunik aallartitsisoqarnissaa. Eqqarsaat tamanna namminersulernissap eqqartulerneraniilli qimannikuuarput. Kalaallit kissaatiginikuuaat Danmarkip Nunaoil-imi piginneqataassutaasa kalaallinit tiguneqarnissaat, tamannalu isumaqatigiissutigereernikuuarput.


Aleqa Hammond nangilluni oqarpoq:
- Nunat inoqqaavisa arfanniartarnerinut tunngatillugu Arfanniarnermut Ataatsimiititaliarsuup suleriaasia kalaallillu angisuunik arfattassinneqarnerinut tunngasut ullumi ilanngullugit eqqartorpagut. Arfanniarnermut Ataatsimiititaliarsuarmut periusissatsinnik ataatsimoorlutik suliaqarnissaanik saqqummiinissaanillu Nunanut allanut Ministeri aamma Aalisarnermut, Piniarnermut Nunalerinermullu Naalakkersuisoq qinnuigineqassapput.


Nunat tamalaat aallartitaat
Naalakkersuisut siulittaasortaavata ualeq manna nunat tamalaat aallartitaat Kalaallit Nunaata Aallartitaqarfiani tikilluaqquai. Naalakkersuisunngortitsinermi qulequttat pingaarnerit taakkulu tulleriiaarneqarsimaneri pillugit nunat 40-t ambassadørii Aleqa Hammondimit saqqummiivigineqarput.

Naalakkersuisut siulittaasuat Aleqa Hammond Dronningimit siullermeerutaasumik pingasunngorpat tikilluaqquneqassaaq

Aleqa Hammondip Danmarkimi tikeraarnermini Dronningi ilanngullugu naapissavaa. Tamanna pissaaq aqagu pingasunngornermi nal. 11.30 Amalienborgimi.

Aleqa Hammond:
- Naalakkersuisuni siulitaasunngortup Danmarkimut tikeraaqqaarneranut atatillugu Dronningimik naapitsisalernissaanik aaqqissuussisalernissamik aallarniisinnaagama tulluusimaaqaanga.


International Press Centerimi tusagassiortunik katersortitsinissaq
Pisussat taaneqareersut saniatigut pingasunngornermi ulloq 16. april nal. 09.00, International Press Centerimi, Ny Vestergade 2-mi tusagassiortunik katersortitsisoqassaaq.