Air Greenland A/S-imut angusaq pitsaasoq

Air Greenland A/S ukiumi qaangiuttumi pitsaalluinnartumik angusaqarpoq akileraarutit akilertinnagit 107 mio. kroninik sinneqartoorami, angusanut kingullernut naleqqiullugu pitsanngoriangaatsiarluni, soorluttaaq tamanna Air Greenland-ip 2012-imi naatsorsuutigisamik akileraarutit akilernannagit 60 mio kronit angullugit sinneqartuussamaarnermik oqariartuutaanut sanilliullugu malunnaatilimmik pitsanngoriaataavoq. Angusat pitsaasut pingaarnerusumik ingerlatseqatigiiffiup aningaasartuutaanit annikillisaanikkut pilersinneqarsimapput.

Naalakkersuisunit iluarineqarpoq pitsaasumik aningaasaqarniarnikkut ineriartorneq, ingerlatseqatigiiffimmit unammilleriartuaarnissamut tunngatillugu pitsaasumik aallaaviliisoq, tamannalu ajornanngippat atuisunut akikinnerusumik timmisartornermi bilitsinut aamma pitsaanerusumik sullissinertut isikkulerluni iluaqutaaniartussaavoq.

Air Greenland inuiaqatigiit sinneri assigalugit pissanganartumik ineriartortoqarnissamiippoq, tassani aatsitassarsiornerup tungaatigut periarfissat ingerlatseqatigiiffimmut annertunerusumik ineriartornermik pilersitsisinnaasut. Naalakkersuisut naammagisimaarpaat taamatut ineriartornissamut ingerlatseqatigiiffik piareersarmat inuiaqatigiinnut piginneqataassutinillu piginnittunut iluaqutaasumik.

Tamanna tunngavigalugu Naalakkersuisut Siulittaasuat Aleqa Hammond oqaaseqarpoq:

"Naalakkersuisunit Air Greenland-ip angallavigisartagaa Nuup aamma Iqaluit akornanniittoq isigineqarpoq nalinginnaasumik angallannerup aaqqissuunneqarsimaneranik allanngortitsinialernerit ilaattut, tamakkualu ukiuni aggersuni inuiaqatigiinnut pitsaanerusumik ineriartornissamut periarfissiissallutik.”

Naalakkersuisunit piginneqataassutillit soorluttaaq ingerlatseqatigiiffimmi siulersuisut aamma sulisut pitsaasumik angusaqarnermut qujassuteqarfigerusunneqarput. Naalakkersuisut qilanaaraat ukiuni aggersuni ingerlatseqatigiiffiup ineriartorneranik malinnaanissartik.

Naalaakkersuisunit toqqagaallutik siulersuisuni ilaasortat taakkuuginnarput, tassalu Jens Wittrup-Willumsen aamma Julia Pars.