Sap. ak. 18-mut aningaasaliissutinik qinnuteqarit

Sap. ak. 18 tassaavoq nuna tamakkerlugu imigassap, imigassamik atueriaatsip imigassartoriaatsillu sammineqartarfia. Sap. ak. 18-imi aaqqissuussinermut atugassanik Peqqissutsimut Naalakkersuioqarfiimmut marsip 15-at nallertinnagu qinnuteqarsinnaavutit.

Sap 18-imi kommunit, pinaveersaartitsinermi ataatsimiititaliat, atuarfiit, peqatigiiffiit, innuttaasut allallu- imigassamik atueriaaseq imigassartoriaaserlu qitiutillugillu oqallisaanissaannut aaqqissuussinissap pilersaarusiornissaanut ingerlatsinissamullu - kajumissaarneqarput.

Silaarunnani aalakoorneq qulequtsiullugu sap. ak. 18 ataatsimooqatigiittarnigut aallaavigalugit imigassamik atueriaatsitta oqaluuserinissaa periarfissinniarneqassaaq.

Imigassaq pillugu oqaloqatigiinneq pingaaruteqaqaaq, inuillu uatsinnut attuummassuteqartut imal. suleqatit imigassartorpallaarnerisa kingunerisinnaasaasa oqaluuserineqarnerat pitsaasuuvoq.

Sap. ak. 18 –imik qulequtserlugu imigassamik atornerluinermut tunngatillugu iliuuseqarneq, Imigassaq Ikiaroornartorlu pillugit Siunnersuisoqatigiit siunnersuutaannik pingasunik tunngaveqarpoq:

  • Meeqqat inuusutullu 18-iliineqanngitsut imigassartunngilluinnartariaqarput.
  • Naartuguit-naartulernissalluunniit pilersaarutigigukku imigassartoqinak.
  • Imigassartornermi imertarfiit tallimat sinninngisaannakkit.

Sap. ak. 18 pillugu paasissutissat sukumiinerusut qinnuteqaallu immersugassaq nittartakkami: www.peqqik.gl -imi pissarsiassaapput.